Заедно со судијката Антоанета Димовска од Основниот граѓански суд Скопје, Нанев е во конкуренција за местото на Герасимовски, односно за член од скопското апелационо подрачје
Претседателот на Основниот суд Кавадарци, Лазар Нанев, влезе во трка за член на Судскиот совет за едно од двете испразнети места по оставките што си ги поднесоа врховната судијка Мирјана Радевска-Стефкова и Зоран Герасимовски, кој е судија во скопска Апелација.
Заедно со судијката Антоанета Димовска од Основниот граѓански суд Скопје, Нанев е во конкуренција за местото на Герасимовски, односно за член од скопското апелационо подрачје.
Првично, судијката Димовска беше единствена кандидатка на листата која ја утврди комисија во Судскиот совет, но во рокот од 48 часа тој поднел приговор кој денеска на седница со осум гласа „за“ и два „против“ беше прифатен.
Со тоа, членовите на Судскиот совет го сместија и него на кандидатската листа со Димовска, а судиите од скопското апелационо подрачје на 13 јули на непосредни избори ќе треба да изберат еден од нив.
Поранешната претседателка Весна Дамева јавно кажа дека ќе гласа против, а според дискусијата со став против веројатно беше и судијката Мери Радевска.
Нанев првично не беше ставен на кандидатската листа поради тоа што не поднел комплетна документација. Еден од документите што му недостасуваа била и оригинал потврда од Академијата за судии и јавни обвинители, која, како што кажаа дел од членовите кои го поддржаа, ја доставил заедно со приговорот електронски бидејќи со задоцнување ја добил од Академијата.
Нецелосни биле и податоците за неговото оценување и имало генерално наведено колкав стаж има, а немало прецизирано колку од него е како судија. Меѓутоа, за мнозинството членови тоа не беше проблем бидејќи оценките и стажот ги имало во архивите на Судскиот совет.
Судијката членка Мери Радевска принципиелно рече дека без разлика на тоа, ако во Законот пишува дека кандидатот треба да ги достави, тогаш мора да се почитуваат законските одредби.
„Точно е дека Судскиот совет ги има тие податоци, но кога некој донел Закон и има законска регулатива дека кандидатот доставува, ние како членови треба да го почитуваме тоа. Мене ме зачудува кога кандидат за член на судски совет при објавен оглас и познавање на законот не ги доставил навреме документите“,
беа дел од забелешките на судијката.
Дамева, која гласеше против, истакна дека за неа е нејасно од каде судијата Нанев точно и прецизно ги знаел причините зошто првично не се нашол на листата, па во приговорот такстативно се осврнал на нив.
Колегите членови таа ги потсети и како за слични околности дискутирале и гласале на седница во август лани, а денеска молчат.
„Видно од тој записник може да се видат дискусиите на одредени членови кои денеска молчат, а тоа се случуваше пред помалку од една година. Ова го кажувам бидејќи е нужно секој од нас совесно да постапува. Особено важно е Судскиот совет за исти или слични прашања да има конзистентен став. Формалниот аспект за мене е небитен и минорен во споредба со другите аспекти што се важни. Станува збор за етички, морални вредности. Овие аспекти е важно сите да ги имаме предвид бидејќи Судскиот совет е пред голем предизвик. Не сме во ситуација да импровизираме особено по 26.4.2023 (седницата кога се случи контроверзното нејзино разрешување од претседателската функција)“,
рече Дамева.
Другите членови кои гласаа да се прифати приговорот, пак, сметаат дека нема ништо спорно и дел од нив потсетија дека ваква пракса да се прифаќаат податоците, како што се за оценувањето и за стажот, веќе имало и порано и за тоа било дискутирано и на колегиум.
Селим Адеми нагласи дека Нанев доставил податок за стаж, само не прецизирал колку е судиски. Но, тоа рече дека го пишувало во неговата биографија и го има во базата на податоци на Судскиот совет. За оценувањето, пак, рече дека имал фотокопија, но и тоа рече е документ кој во оригинал го издава и има Судскиот совет.
„Според мене, логички треба да се прифати приговорот, а од друга страна на овој судски совет донесовме заклучок и одлука каде се кажа дека за спорните пријави одлучува Судскиот совет“,
рече Адеми.
Освен за местото што ќе го пополнат Нанев или Димовска, на 13 јули ќе се гласа и во Врховен за да се избере член на Советот од редовите на врховните судии. Како што веќе објавивме, единствен кандидат е судијата Наке Георгиев кој извесно е дека ќе го заземе местото на неговата колешка Мирјана Радевска-Стефкова која си поднесе оставка.
Пред и официјално да го утврди како единствен кандидат, за Георгиев, вчера Судскиот совет одлучи да запре постапка за одговорност во предмет кој се чувал во фиока неколку месеци. За истиот случај, пак, претходно Судскиот совет разреши тројца судии од штипскиот Апелациски суд, за предмети кои се воделе во периодот кога претседател беше токму Георгиев.