Советот денеска ја утврди кандидатската листа за избор на двајца нови членови за местата кои се испразнија откако по сите контроверзии оставки си поднесоа врховната судијка Мирјана Радевска-Стефкова и Зоран Герасимовски, кој е судија во скопска Апелација
Судијата Наке Георгиев од Врховниот суд остана единствен кандидат од редовите на врховните судии за член на Судскиот совет.
Советот денеска ја утврди кандидатската листа за избор на двајца нови членови за местата кои се испразнија откако по сите контроверзии оставки си поднесоа врховната судијка Мирјана Радевска-Стефкова и Зоран Герасимовски кој е судија во скопска Апелација. Георгиев е единствен кандидат за местото на Радевска-Стефкова.
Утврдувањето на листата следува откако претходно Комисијата за подготовка на кандидатските листи го изготви списокот и потоа истече рокот од 48 часа за приговори од кандидати кои не се најдоа на неа. Со оглед дека Георгиев бил единствен кој конкурирал, за листата немало приговори.
За утврдување на листата, „за“ гласаа речиси сите членови на Судскиот совет односно деветмина од десет присутни. Единствена „против“ беше поранешната претседателка Весна Дамева.
„Одлучив гласно да молчам и со молчење да го бранам мојот став против“,
рече Дамева.
Претседателот на Советот, Сашко Георгиев, пак, не гласаше бидејќи беше отсутен од седницата со која претседаваше заменик-претседателот Ханиф Зендели. Покрај утврдувањето на кандидатската листа, Судскиот совет денеска формираше и Комисија за спроведување на изборите и донесе решение за нивно одржување на 13 јули годинава.
Името на судијата Наке Георгиев, кој е на чекор да стане член на Судскиот совет, периодов е во фокусот на јавноста бидејќи против него се водеше постапка за утврдување одговорност во периодот кога тој беше претседател на Апелацискиот суд во Штип. Меѓутоа, симптоматично е што вчера на затворен дел од седницата Судскиот совет реши да ја запре постапката против Георгиев откако предметот за него беше држен во фиока неколку месеци. За истиот случај за кој се водеше постапка против овој судија за периодот кога тој беше на чело на штипска Апелација, пак, претходно беа разрешени тројца судии.