Европската страна сега чека одговор – дали косовските власти го прифаќаат новиот предлог
Специјалниот претставник на ЕУ за дијалог меѓу Белград и Приштина, Мирослав Лајчак, до властите во Приштина достави нов предлог од Брисел за решение на кризата на северот на Косово, во пресрет на 21 ноември, кога треба да почнат казните за граѓаните кои не ги замениле српските регистарски таблички со косовски, пишува денеска Радио Слободна Европа.
Лајчак овој предлог на вчерашната средба во Брисел му го доставил на главниот косовски преговарач во дијалогот Бесник Бисљими.
Европската страна сега чека одговор – дали косовските власти го прифаќаат новиот предлог.
Иако нема многу детали за тоа што стои во последниот предлог, извори од РСЕ потврдија дека се прави се со цел да се најде барем привремено решение, за да се избегне ескалација што може да дојде од 21 ноември кога косовските власти ќе почнат да издаваат казни за сопствениците на возила со српски регистрации во Косово.
„Не се исклучува можноста еден од можните елементи да биде одложување на примената на казните за одреден временски период, но ‘не нужно за 10 месеци’“,
наведе РСЕ повикувајќи се на извори од Брисел.
Во случај Приштина да одговори потврдно на последниот предлог, се очекува специјалниот претставник на ЕУ веднаш да замине во Белград за да се официјализира согласност на страните за решение на кризата.
Лајчак пред два дена оцени дека сегашните тензии на релација Белград-Приштина се „најсериозната криза од 2013 година“ и предупреди дека решението мора да се постигне пред 21 ноември.
ЕУ во неколку наврати побара од Приштина да се откаже од издавањето на овие казни и побара одложување на спроведувањето на одлуката за укинување на регистарските таблички издадени од српските власти и кои ги користат српските граѓани на Косово, кои живеат на северот на земјата.