Косовскиот премиер рече дека последните именувања на Срби за членови на неговата Влада, на кои се противат најголемата партија на косовските Срби, Српска листа (СЛ) и официјален Белград, ги извршил согласно одредбите на Уставот на Косово со кои се регулираат малцинските права
Не можам да зборувам за нивото на едикација на државниот челник на нашиот северен сосед (српскиот претседател, Александар Вучиќ н.з.) изјави денеска косовскиот премиер, Албин Куртин прашан од новинарите за коментар за вчерашната изјава на Вучиќ, кој поради последните именувања во владата во Приштина го нарече претседателот на косовската влада „терористичко ѓубре“.
Косовскиот премиер рече дека последните именувања на Срби за членови на неговата Влада, на кои се противат најголемата партија на косовските Срби, Српска листа (СЛ) и официјален Белград, ги извршил согласно одредбите на Уставот на Косово со кои се регулираат малцинските права.
„Јас можам да зборувам за ставовите и идеите, за меѓусебните согласувања и несогласувања, но не можам да зборувам за нивото на едукација на државниот челник на нашиот северен сосед. Што се однесува до правата на малцинствата во Косово, тие се регулирани со посебно поглавје во Уставот на Косово во вкупно 6 членови… и верувам дека тие што се незадоволни од Уставот треба да изнесат докази и да аргументираат за да кажат што не е во ред и што не е доволно“,
рече Курти.
Претседателот на Србија, Александар Вучиќ, вчера излезе со остри критики и навреди за Србите кои влегоа во владата на косовскиот премиер Албин Курти.
Тој ја критикуваше одлуката лидерот на Прогресивната демократска партија, Ненад Рашиќ, да биде министер за заедници на Косово, а партиската потпретседателка Рада Трајковиќ да биде советничка на премиерот.
Вучиќ за Трајковиќ рекол дека е „српско ѓубре од дното на казанот“, а на Курти му го доделил епитетот „терористичко ѓубре“.
Тој додаде дека од Рашиќ и Трајковиќ „не постојат полоши“ и дека тие немаат доверба кај Србите на Косово туку „доверба од западните агенции и терористичкото ѓубре Курти“.
Реакциите од ЕУ за именувањето на Рашиќ, српскиот претседател ги нарече срамни и нагласи дека поради тоа делегација од Србија нема да учествува на самитот на Унијата и Западниот Балкан во Тирана.
Рашиќ на функцијата министер беше поставен откако од функцијата оставка поднесе Горан Ракиќ од редовите на Српската листа, која е поддржана од властите во Белград.
Ракиќ, како и другите косовските Срби колективно ги напуштија институциите во знак на протест поради одлуката на владата на Косово за пререгистрација на возилата со српски регистарски ознаки со РКС (Република Косово).