Тој додаде дека официјален Белград денеска зборува и се однесува исто како и пред 23 години и дека Србија ја води истиот тим, предводен од поранешниот портпарол на поранешниот претседател на Србија, Слободан Милошевиќ
Косовскиот премиер Албин Курти по седницата на Советот за безбедност изјави дека Србија повторно се заканува со војна и со најавите за враќање на војската во Косово сака да ја продолжи војната што ја загуби во 1999 година, објави Бета.
„По 23 години од крајот на војната, Србија повторно се заканува со војна и враќање на нејзините воени сили кои извршија геноцид на Косово“,
рече Курти, пренесува Бета.
Тој додаде дека официјален Белград денеска зборува и се однесува исто како и пред 23 години и дека Србија ја води истиот тим, предводен од поранешниот портпарол на поранешниот претседател на Србија, Слободан Милошевиќ.
Тој оцени и дека Србија не крие дека сака да ја продолжи војната што ја изгуби, и дека, како што наведе, претставува постојана закана за мирот во земјата.
Курти додаде дека мирот останува кревок на северот на земјата и додаде дека планот на Марти Ахтисари за Косово и Метохија е болен компромис со кој српската заедница доби загарантирани и проширени права.
Тој истакна дека интеграцијата на северот не се случи ниту по прогласувањето на независноста ниту по една деценија дијалог во Брисел.
Ксовоскиот премиер ја критикуваше поранешната влада во Приштина дека склучувала договори „со криминалци како (Милан) Радоичиќ и (Звонко) Веселеновиќ за формирање влада“.
Тој исто така рече дека неговата влада е заинтересирана за соработка со српската заедница на Косово и дека сака српската заедница да ги заземе функциите што ѝ припаѓаат според Уставот на земјата.
Според Курти, Србија „преку криминалните групи и користејќи го отсуството на целосно владеење на правото на север“, веќе подолго време ги држи Србите како заложници.
„Ние, во партнерство со ЕУ и САД, толериравме неколку одложувања во спроведувањето на нашите одлуки, но секое одложување е предмет на одреден рок“,
рече тој.
Додаде дека владата во Приштина не се откажала од ниту една своја одлука и дека незаконитоста нема да се толерира во ниту еден дел од земјата.
Тој ги повика граѓаните на Косово и Метохија од српска националност да се оградат од криминалните групи.
„Ние сме влада на мирот која ќе ја заштити безбедноста на сите граѓани. Милитаризацијата на Србија нè доведе до оваа ситуација“,
рече тој.
Курти оцени дека оваа милитаризација е закана за целиот регион и дека по состанокот на Советот е донесена одлука за зголемување на будноста и безбедноста.
По вчерашната ескалација на ситуацијата на северот на Косово, откако косовските власти го уапсија поранешниот припадник на косовската полиција Дејан Пантиќ на граничниот премин „Јариње“, Србите од Северна Митровица и од други населени места каде што живее српско население ги блокираа патиштата во овој дел на земјата.
Високиот претставник на Европската унија (ЕУ) за надворешна политика и безбедност Жозеп Борел повика на отстранување на барикадите и деескалација на ситуацијата на овој дел од земјата. Тој додаде дека сите актери мора да избегнат ескалација и ги осуди нападите со шок-бомби на припадниците на ЕУЛЕКС.