Во Прилеп, Куманово и Тетово од денеска е задолжително носење опрема за лична заштита како маска, марама, шал или што било за да се покријат устата и носот надвор од своите домови, на сите јавни места и површини од отворен и затворен тип, како и затворени простории, маркети, продавници или друго.
Со истата мерка Владата препорачува граѓаните да го редуцираат излегувањето од своите домови, и тоа само од најнеопходни причини, заради одење на работа, како и излегување од својот дом на само еден член од семејството заради купување намирници и лекови од маркетите и аптеките.
Министерството за правда треба законски да ги уреди казните за граѓаните кои нема да ги почитуваат мерките. Со уредбата со законска сила правно се нормира начинот, изрекувањето и висината на мандатните казни кон сите физички и правни лица кои нема да ги почитуваат одлуките, што се однесуваат на групирање на јавни места и површини на повеќе од две лица, за непочитување на минимум потребното растојание од два метра и неносење заштитна опрема.
Најпрво ќе се даваат само опомени, дури потоа казни. Ако дојде до изрекување казна, полицијата ќе има обврска да има фотографија со која ќе ја оправда мандатната казна.
„Целта не е да се казнува, туку да се обезбеди што е можно пошироко почитување на мерките, од сите“,
велат од Владата.
Денеска на владина седница ќе бидат предлозите за олеснување на мерките за движење на населението, како и дополнителните мерки за заштита, како носење заштитна опрема, предложени од Комисијата за заразни болести.
Една од нив е полицискиот час во работните денови да започнува од 19 часот, а за викендите да почнува од 13 часот во сабота и да трае до 5 часот наутро во понеделник.
Останатите мерки што вчера ги соопшти министерот за здравство Венко Филипче предвидуваат задолжително носење заштитна опрема при движење во затворени простории или јавни површини каде што нема можност за држење физичка дистанца од два метра, како и зголемување на часовите во кои постарите лица од 65 години и помладите од 18 години ќе можат да се движат во текот на денот.