Општинскиот кризен штаб на Куманово бара Владата да прогласи карантин на територијата на целата општина, со поставување контролни пунктови од страна на МВР на секој влез и излез во градот, на кои воедно ќе се врши контрола и соодветна дезинфекција на сите возила и патници. Со преземање препораки, заклучоци и мерки, кумановци очекуваат поригорозни одлуки од централната власт откако вчера беше регистрирана првата жртва од коронавирусот во земјава, токму од овој град. Се задолжува и јавното претпријатие „Чистота и зеленило“ од Куманово да ги дезинфицира влезовите на станбените згради, како и да се затворат капелите.
„-Бараме од Владата на Република Северна Македонија да обезбеди поголем број тестови за вирусот ковид-19 и да отвори повеќе пунктови за тестирање на лица;
-Зголемување на полициски час во времетраење од 18 до 6 часот;
-Се задолжува ЈП ‘Чистота и зеленило’ Куманово да изврши дезинфекција во сите влезови на станбени згради и ходници;
-Се задолжува ЈП ‘Чистота и зеленило’ Куманово и се препорачува да бидат затворени капелите во наредниот период, а погребување да се врши на самото гробно место;
-Се бара од Општина Куманово да даде на користење четири возила на СВР Куманово за нивни потреби, по претходно доставено барање од нивна страна“,
се вели во соопштението на Општинскиот штаб за заштита и спасување во врска со преземање активности и мерки од ширење на болеста ковид-19.
Досега во земјава има две жртви од коронавирусот, кои се од Куманово и од Дебар. Вкупниот број на заболени до денеска до 12 часот изнесува 136 лица.
*поврзана вест: Сите нови случаи се во врска со претходно заразени, нема автохтоно жариште во Македонија