Кризниот штаб на Куманово денеска ѝ предложи на Владата да го стави градот во 14-дневен контролиран карантин и воведување кризна состојба.
„Првата мерка што ја предлагаме директно до Владата е 14-дневен контролиран карантин во Општина Куманово и воведување кризна состојба на територијата на Општината, затворање на влезовите и излезите во градот, а олеснување да има само за лица што треба да вршат професионални работни задачи. Тие со посебна дозвола ќе можат да го напуштат и да се враќаат во градот, под посебни услови со претходно воведена дезинфекција на сите пунктови и на возилата и на лицата што влегуваат и излегуваат во градот“,
изјави градоначалникот на Куманово, Максим Димитриевски.
Димитриевски побара ваква мерка по примерот на Дебар.
„Кризната состојба ја бараме за да се засили присуството на државните институции и органи и тие директно да се вклучат на територија на Општина Куманово во борба против вирусот по примерот на Дебар. Сметаме дека ова е добар пример кој може да се примени и во Куманово со цел ова болест да биде искоренета на територија на наша општина и воедно да не претставуваме закана и за останати општини во регионот со ширење на овој вирус“,
вели Димитриевски
Тој, исто така, побара што е можно поскоро да се донесе одлука за реорганизација на работењето на Општата болница во Куманово бидејќи досега 44 медицински лица се позитивни на ковид-19.