Во врска со објаснувањето на струшкиот затвор за денешното неспроведување на Мијалков, од Кривичен велат дека наредбата за спровод (за која зборува директорот на КПД Струга) се однесува за 12 декември 2022 година кога се одржала последната расправа од судскиот процес. За сите детали во врска со неспроведувањето на Мијалков од струшкиот затвор за денешното рочиште за случајот „Титаник 2“, Кривичниот суд ја известил Управата за извршување санкции при Министерството за правда, а заради одржување на текот на расправата следното рочиште од судскиот процес е закажано на 26 декември 2022 година, односно в понеделник
Основниот кривичен суд Скопје попладнево сподели фотографии од повратницата од доставената наредба за спровод на ексдиректорот на УБК, Сашо Мијалков, за денешното рочиште за случајот „Титаник 2“, која, како што велат од судот, покажува кога треба да се изврши спроводот, односно дека нема никаква грешка со датумите, како што тврди директорот на струшкиот затвор.
Претходно фотографии со службената преписка меѓу судот и затворот сподели со медиумите директорот на Казнено-поправниот дом Струга, Ваљон Ќура, како поткрепа на неговите тврдења дека неспроведувањето на Мијалков е поради техничка грешка на Кривичниот суд со датумите од наредбата за спровод.
„Судечкиот совет кој постапува по предметот, на денешната главна расправа, по добивање на информацијата дека обвинетиот не е спроведен од Затворот Струга, пред сите присутни странки и јавноста на судењето ја прикажа Повратницата од достава на наредба за спровод, примена во затворот на 14.12.2022 година, а на која под графата Евиденција (ЕВ) за време е наведена датата 22.12.2022 година што е показател за денот кога треба да се изврши спроводот“,
се вели во соопштението од скопскиот Кривичен суд, во прилог на кое се и фотографиите од повратниците.
Оттаму појаснуваат дека судската пракса по која се постапува, наредбата за спровод на лице, може да содржи дата за насрочена прва главна расправа, а за сите понатамошни наредби важи евиденцискиот број на повратницата која ја добива затворот.
Во врска со објаснувањето на струшкиот затвор за денешното неспроведување на Мијалков, од Кривичен велат дека наредбата се однесува за 12 декември 2022 година кога се одржала последната расправа од судскиот процес.
„Особено е важно да се истакне дека затворот истата ја примил на 14.12.2022 (евидентно од повратницата) па нејасно е како би ја спровеле наредбата два дена подоцна“, стои во соопштението од судот. Дотолку повеќе што на судењето одржано на 12.12.2022 година во присуство и на обвинетиот, неговите бранители како и спроводната служба од Затворот Струга е нагласено дека следната расправа е насрочена (закажана н.з.) за 22.12.2022 година и сите присутни се сметаат за уредно повикани“,
велат од Основниот кривичен суд Скопје.
За сите овие детали Кривичниот суд, како што информираат оттаму, ја известил Управата за извршување санкции при Министерството за правда, а заради одржување на текот на расправата следното рочиште од судскиот процес е закажано на 26 декември 2022 година, односно в понеделник.
Директорот на Казнено-поправниот дом Струга денеска излезе со тврдење дека техничка грешка на Основниот кривичен суд Скопје, односно погрешни датуми наведни во наредбата за спровод од струшкиот затвор наводно е причината за денешното отсуство на ексдиректорот на УБК, Сашо Мијалков, од продолжението на судскиот процес за случајот „Титаник 2“ поради што тоа беше одложено.
Според него, во струшкиот затвор на 28 ноември стигнала наредба од Основниот кривичен суд Скопје, Мијалков да биде спроведен од затворот во судот на рочиште закажано на 12 декември. Од затворот, како што наведува Ќура, постапиле по наредбата и го спровеле Мијалков, но го вратиле назад бидејќи рочиштето се одложило.
Потоа на 14 декември до КПД Струга стигнала нова наредба за спроведување на Мијалков за рочиште за истиот предмет, но повторно со истиот датум – 12.12.2022, кога Мијалков треба да биде спроведен во Основниот кривичен суд Скопје.
„Станува збор за техничка грешка од страна на Кривичниот суд. Во нашата институција прво примивме наредба за спроведување на осудениот С.М. на 28.11. 2022, за одредено судско рочиште на 12.12.2022 година. По оваа наредба ние имаме постапено и сме го испратиле осудениот С.М. на конкретното рочиште. Ова судско рочиште е одложено и потоа на 14.12.2022 година во нашата институција повторно пристигна барање од Кривичниот суд за истото лице, но и ова барање беше со ист датум како и за претходното рочиште, односно 12.12.2022 година. Значи, евидентно е дека станува збор за техничка грешка“,
вели директорот на КПД Струга, Ваљон Ќура, во порака испратена преку Вибер.
Инаку, од двете наредби што ни ги достави директорот на затворот може да се види дека првата судот ја испратил на 23 ноември, а во КПД Струга со печат е заверена како примена на 28 ноември, датум на кој според Ќура била и примена. Датумот кога Мијалков треба да биде спроведен во Скопје на рочиште во Кривичниот суд е 12.12.2022 година.
Втората наредба што ни ја испрати Ќура, всушност, е истиот документ, единствено разлика е во печатот со кој е заверена како примена од затворот е наведен датумот 14.12.2022 година.
За потсетување, Мијалков е на издржување на тригодишната затворска казна во струшкиот затвор откако се спогоди со Обвинителството за гонење на организиран криминал и корупција во случајот „Империја“.
За денешниот случај со неспроведувањето на Мијалков се огласи и Управата за извршување санкции при Министерството за правда, од каде што велат дека Управата ќе ги преземе сите активности и најави вонреден инспекциски надзор на КПД Струга за расчистување на случајот.
„Во врска со постапката за спроведување на Сашо Мијалков од КПД Струга на повторено судење за случајот ,Титаник 2` ве информираме дека Управата за извршување на санкции ќе ги преземе сите активности кои се во нејзина надлежност и ќе направи вонреден надзор во установата за утврдување на фактичката состојба.Ќе се утврдува одговорност и ќе бидат санкционирани сите кои направиле пропусти, намерни или ненамерни. За извршениот вонреден надзор, јавноста ќе биде дополнително информирана“,
стои во соопштението од Управата за извршување санкции.
Денешното одлагање на рочиштето ја зголеми можноста од застарување на делото во однос на Мијалков, кој во овој предмет е обвинет за кривичното дело примање награда за против законито влијание. Според пишувањето на дел од медиумите, кривичното дело за кое се товари Мијалков застарува за околу четири месеци, период во кој се многу мали шансите да се стигне до правосилна пресуда.
„Титаник 2“ се однесува на договарање за гласање во ДИК во врска со приговор на ВМРО-ДПМНЕ за локалните избори 2013 година.
Покрај Мијалков и Мендух Тачи, во случајот се обвинети и поранешните членови на ДИК, Бедредин Ибраими, Анета Стефановска, Влатко Сајковски и Сашо Срцев.
Инаку, Кривичниот суд во Скопје втор пат води постапка за овој предмет откако во првиот случај првостепената пресуда беше укината од Апелацискиот суд и предметот беше вратен на повторно одлучување.
Со првостепената пресуда која Кривичниот суд ја донесен на 8 март 2019 година Мијалков доби 3 години затвор, а на 3 години и 2 месеци беше осуден Мендух Тачи.
Најголема затворска казна доби поранешниот член на ДИК, предлог на ДПА, Бедредин Ибраими – 4 години и 6 месеци, додека членовите на ова тело од редовите на ВМРО-ДПМНЕ, Анета Стефановска, Влатко Сајковски и Сашо Срцев добија по три години затвор.
Но, кон крајот на 2019 година, скопска Апелација соопшти дека се уважени жалбите на обвинетите и дека ја укинува пресудата поради суштествени повреди на постапката и предметот го враќа на повторно судење.
Последната одлука на скопска Апелација со која ја укина првостепената пресуда за случајот „Таргет-Тврдина“, со која ексдиректорот на УБК беше осуден на 12 години затворска казна во врска со аферата за масовното прислушување, ја сензибилизираше јавноста околу разврските на случаите кои произлегоа од истрагите на поранешното Специјално јавно обвинителство.