Упатниот акт не значи и дека веднаш ќе се почне со издржување на казната со оглед дека согласно Законот за извршување санкции постои опција да се побара и одложување на извршувањето
Основниот кривичен суд Скопје издаде упатен акт за бизнисменот Јордан (Орце) Камчев за затворската казна во случајот „Империја“, потврдија од судот за „360 степени“.
За кој датум и во кој затвор тој е упатен за извршување на казната од судот велат дека детали ќе соопштат утре. Исто така, се очекува во текот на утрешниот ден да бидат објавени информации и за упатниот акт за Ненад Јосифовиќ, исто така, дел од случајот „Империја“.
Меѓутоа, упатниот акт не значи и дека тие веднаш ќе почнат да ги издржуваат казните, бидејќи согласно Законот за извршување санкции имаат право да бараат одложување.
Двајцата признаа вина во случајот „Империја“, се спогодија со Обвинителството за гонење организиран криминал и корупција и добија по една година затвор. Дел од спогодбата е и враќање во државниот буџет на 5,2 милиони евра, кои Камчев преку една од своите фирми ги уплатил во УЈП на 26 април односно набргу по постигната спогодба.
Постигнатите спогодби со двајцата се однесуваат за кривични дела за периодот до 2009 година. Камчев се спогоди за делото злоупотреба на службената положба и овластување, а Јосифовиќ за перење пари и други приноси од казниво дело.
Инаку, во спогодбите за затворските казни влегува и времето кое обвинетите го поминаа во ефективен и во куќен притвор. Неофицијалните пресметки, според судските одлуки за притворите и медиумските написи, се дека Камчев во рамки на „Империја“ во притвор помина околу 4 месеци.
И Камчев и Јосифовиќ се осудени и во случајот „Плацови на Водно“. Таму против нив се водеше судски процес, кој со првостепена пресуда заврши на 21 април годинава. Со оваа пресуда, која не е правосилна, Камчев доби една година затвор, во која се засметува и времето поминато во притвор. Во овој случај, тој во притвор веќе помина околу 10 месеци. Јосифовиќ, пак, во „Плацови на Водно“ доби условна казна од две години затвор која нема да се изврши ако во рок од 5 години од правосилноста не стори ново кривично дело.
Фото: МИА/Архива