Владата на денешната седница го утврдила предлогот за нов анекс на договорот со кинеската компанија „Синоходро“ за завршување на изградбата на делницата. Како причина за пролонгирање на рокот за изградба на автопатот, кој првично беше 31 декември 2023 година, од Владата ги наведуваат 13-те нови свлечишта што се појавија на трасата, како резултат на „првичниот несоодветен проект и предвремен почеток на изградба на оваа делница“
Новиот краен рок до кога треба да бидат завршени градижните работи на автопатот Кичево – Охрид да биде 31 декември 2026 година предвидуваат законските дополнувања, односно анексот на договорот за изградба на автопатот што Владата го утврдила на денешната седница.
Одлуката за продолжување на рокот за изградба на делницата, кој според првичните проекици требаше да биде готова до крајот на минатата година, како што соопштија вечерва од Владата е донесена на предлог на Министерството за транспорт и врски.
„Владата, на предлог на Министерството за транспорт и врски, ја разгледа Информација за потребата од донесување Закон за дополнување на Законот за реализација на инфраструктурни проекти за изградба на патна делница Миладиновци – Штип и патна делница Кичево – Охрид, заради склучување Анекс број 6 кон Договорот за изградба на автопат, делница Кичево – Охрид и ги утврди предлог одредбите на дополнувањето. Со утврдените законски дополнувања, 31.12.2026 година се предвидува како краен рок до кога Изведувачот треба да ги заврши работите на оваа автопатска делница“,
се наведува во соопштението на Владата за одлуките донесени на денешната седница.
Како причина за пролонгирање на рокот за изградба, од Владата ги наведуваат 13-те нови свлечишта што се појавија на трасата, како резултат на „првичниот несоодветен проект и предвремен почеток на изградба на оваа делница“.
Бидејќи станува збор за дополнувања на Закон, анексот треба да биде изгласан од Собранието. Дали тоа ќе го направи актуелниот состав е под знак прашање, бидејќи како што беше соопштено денеска последната седница овој парламентарен состав ќе ја одржи в четврток (28 март), или ќе остане за анексот да одлучува следниот состав на законодавниот дом по парламентарните избори закажани за 8 мај.
Неодамна лидерот на СДСМ и поранешен премиер Димитар Ковачевски изјави дека за продолжувањето на проектот за изградба на автопатот Кичево-Охрид ќе одлучи новиот состав на Собранието по изборите и дали тоа ќе биде со истиот изведувач или ќе се бара нов.
Ковачевски на 15 март изјави дека веднаш штом ќе се спроведе ново анексирање во Собранието или нова одлука од пратениците во Собранието, проектот ќе продолжи, затоа што како што рече, тој договор е донесен во Собрание уште пред десетина години.
Лидерот на ВМРО-ДПМНЕ, Христијан Мицкоски, пак пред нешто повеќе од еден месец изјави дека кога неговата партија ќе дојде на власт по изборите в мај, автопатот Кичево-Охрид ќе биде завршен и пуштен во употреба за две години отсега, односно кон втората половина или кон крајот на 2026 година.
Владата, на седница одржана на 28 декември, ги овласти кабинетот на вицепремиерот за економски прашања, Министерството за транспорт и врски и Јавното претпријатие за државни патишта, да отпочнат преговори со изведувачот на изградбата на автопатската делница Кичево – Охрид, кинеската компанија „Синохидро“, за склучување анекс на договор за продолжување на рокот за изведба, со искористување на веќе обезбедените финансиски средства за доизградба на автопатот.
Откако стана јасно дека автопатот нема да биде завршен во првично предвидениот рок (31 декември 2023 г.), од Министерството за транспорт и врски кон крајот на минатата година беше побарано Државниот завод за ревизија да изврши ревизија на проектот, а заедно со Јавното претпријатие за државни патишта (ЈПДП) беше ангажиран и експерт за Фидик договори (меѓународен стандард според кој се реализираат меѓународни договори) да го анализира договорот меѓу Владата и изведувачот на проектот – кинеската компанија „Синохидро“.
„360 степени“ лани во октомври објави сторија за состојбата со изградбата на оваа автопатска делница. Сликата на терен тогаш остави впечаток дека нема реални изгледи изградбата на автопатот од Кичево до Охрид да заврши во 2023 година, како што беше предвидено со закон. Договорот за изградба на делницата е потпишан пред точно 10 години со кинески „Синохидро“, а за тоа досега се потрошени 421 милион од предвидените 598 милиони евра, иако првичната сума за проектот беше 374 милиони.