На виртуелна средба со европратениците Андреас Шидер, Марион Валсман и Илхан Ќучук, спикерот Џафери истакнал дека атмосферата во новиот парламентарен состав е попозитивна отколку во претходниот
Наместо нова средба во рамки на дијаллогот „Жан Моне“, претседателот на Собранието Талат Џафери денеска имаше виртуелна консултативна средба со европратениците Андреас Шидер, Марион Валсман и Илхан Ќучук.
На средбата присуствуваа и координаторите на пратеничките групи и генералната секретарка на Собранието Цветанка Иванова.
Оваа консултативна средба, како што соопштија од парламентот, имаше за цел обезбедување на ажурирање за спроведување на обврските преземени за време на 3 „Жан Моне“ дијалог на Собранието со Европскиот парламент во февруари 2020 година, како и дискусија за целокупната политичка клима и составот на парламентарните сили по изборите одржани на 15 јули 2020 година.
Џафери истакнал дела Собранието, и во овој мандат, останува доследно на одржување на духот на дијалогот, особено сега кога климата е во голема мекра попозитивна. Односно, кога координациите се одржуваат во полн состав и сите координатори имаат можност директно да се информираат и да придонесат за функционалноста на законодавниот дом.
Претседателот на парламентот искажал задоволство за позитивниот Извештај на Европската комисија, во делот за Собранието и ја образложил, како што се посочува, нужноста од скратените постапки кои се применуваа во претходниот период за стекнување на полноправно членство во НАТО и отворањето на можноста за пристапни преговори со Европската комисија.
Тој информираше дека пандемијата со ковид- 19 наметна донесување на вонредни одлуки од страна на Владата, со оглед на тоа што Собранието беше распуштено во тој период.
Веднаш по првата седница, истакнал Џафери, е отворено и прашањето за алтернативните начини на работа на Собранието, со цел одржување на функционалноста и уставната надлежност. Засега, рекол Џафери, Собранието останува да работи со физичко присуство, се додека условите го дозволуваат тоа.
Во однос на следниот дијалог „Жан Моне“, кој засега не може да се организира поради неможноста од физичко присуство, европратениците потврдиле дека Европскиот парламент е подготвен да продолжи со олеснување на процесот затоа што заклучоците од третиот состанок оставиле важно наследство за новиот парламентарен состав, односно предлог за измени на Деловникот за чии реформи во клучните аспекти се согласија сите учесници.