Коментирајќи ги ниските рејтинзи и ставот на мнозинството граѓани дека државата не се движи во правилна насока, премиерот посочи дека анкетата била правена по период кога во земјава владееше хистерија за прифаќањето на предлогот за почеток на преговори, а истражувањето завршило пред да се потпише договорот за ФРОНТЕКС на македонски јазик. Сега успешниот скрининг, како и антикризните мерки, тој очекува да влијаат на повисок рејтинг на следната анкета
Премиерот и лидер на СДСМ, Димитар Ковачевски, смета дека неговиот и рејтингот на партијата што ја предводи и Владата ќе растат во следниот период поради доброто справување со кризата и мерките за помош на граѓаните.
Според денешната изјава во која тој ја коментира анкетата на Центарот за анкетни истражувања на Меѓународниот републикански институт (ИРИ), премиерот смета дека е респектабилен неговиот политички рејтинг од пет отсто. Исто така, неговото име се наоѓа и на листата на тројца најдобри министри со рејтинг од 13 отсто пред, Оливер Спасовски (12) и Фатмир Битиќи (5).
„Јас немам да го коментирам личниот рејтинг на кој било политичар. Секој може да го коментира својот, јас ќе го коментирам мојот. Би кажал дека нашите граѓани знаат да препознаат кога некој го вложува сиот свој труд, напор и енергија во време на најголема економска и енергетска криза да се грижи за одржување на економска стабилност, енергетска стабилност, обезбедување топлинска енергија во Градот Скопје, иако тоа не му е обврска. Само се потврдува дека ако го погледнете делот во ’топ оф маинд‘ одговорите на испитаниците, тогаш практично зборувајќи за себе бидејќи опфаќа 10 месеци од моето назначување, свесноста за работата растела со 1,44 проценти на месечно ниво што е прилично голем процент. Ако гледаме во однос на политичките рејтинзи, тогаш и тоа е респектабилно со оглед на 10-месечниот период на управување со Владата“,
изјави денеска Ковачевски.
Коментирајќи ги резултатите од анкета, според која 58 отсто од граѓаните сметаат дека државата не се движи во правилна насока, премиерот вели дека на тоа влијаел и периодот кога е правено истражувањето односно откако беше прифатен европскиот предлог за отворање на преговорите со ЕУ, а пред да се потпише договорот за ФРОНТЕКС на македонски јазик без фусноти и пред да започне преведувањето на европското законодавство на македонски јазик.
„Голем дел од одговорите не ме изненадуваат со оглед дека тоа беше период на прифаќање на европскиот предлог во Собранието. Тоа се случуваше во јули, анкетата е во септември, што секако влијае врз расположението на граѓани и градењето на перцепциите. Бидејќи знаете дека во тој период беше направена голема хистерија во однос на европскиот предлог, што тоа ќе предизвика, дека Македонците ќе го изгубеле својот јазик, дека ќе сме изгубеле идентитет – тоа го правеше опозицијата, пред сè Левица со нејзиниот заложник ВМРО-ДПМНЕ. И тоа сигурно дека влијаело врз перцепциите на граѓаните“,
рече Ковачевски.
Сепак, нагласи тој, многу важен заклучок е дека, сепак, граѓаните во огромен процент – три четвртини се за зачленување во ЕУ и не гледаат друга алтернатива освен еден мал процент кои гледаат алтернатива во некаква евроазиска унија која ја промовира Левица.
Најголемата економска и енергетска криза по Втората светска војна, растечката инфлација во целиот свет и последиците врз животниот стандард на граѓаните се дел од факторите кои премиерот ги наведе дека исто така влијаеле врз перцепцијата на граѓаните.
„Сметам дека ќе имаат позитивно влијание врз следната анкета што ќе биде правена и објавена и јас со нетрпение ја очекувам“,
рече Ковачевски.
Во однос на ниската доверба во судството (4 отсто целосна доверба) и во обвинителството (3 отсто целосна доверба), пак, тој не сакаше да коментира бидејќи како што рече тоа е посебна власт во државата.