Најпопуларен политичар во земјава е поранешниот премиер Никола Груевски, кој побегна во Унгарија и доби азил од тамошните власти. Груевски води со седум отсто популарност, а по него со еден процент помалку е актуелниот лидер на ВМРО-ДПМНЕ, Христијан Мицкоски, Али Ахмети е трет со шест отсто поддршка, односно еден повеќе од актуелниот премиер и лидер на СДСМ, Димитар Ковачевски
Иако поддршката за влез на земјава во ЕУ е намалена, сè уште се држи високо. Довербата на граѓаните во правосудните институции, политичките партии и парламентот останува загрижувачки ниска. Според резултатите од анкетата на прашањето кое се однесува на довербата на граѓаните во одделни институции и субјекти, судовите и судството во целина ја уживаат довербата на само четири отсто од македонските граѓани. Идентичен е процентот на граѓани што имаат доверба во парламентот и политичките партии, додека на дното со доверба од само три отсто од граѓаните е јавното обвинителство
Мнозинство од граѓаните на С Македонија сметаат дека државата се движи во погрешна насока, но поддршката за членство во Европската Унија (ЕУ) и понатаму останува висока, додека истовремено растат позитивните перцепции за Кина и Русија.
Ова го покажуваат резултатите од новата анкета на Центарот за анкетни истражувања на Меѓународниот републикански институт (ИРИ) за Северна Македонија.
На прашањето за насоката на движење на земјата, само 13 отсто од македонските граѓани одговориле дека таа се движи во вистинска насока, додека 58 отсто го мислат спротивното, односно не се задоволни од насоката каде се движи земјата. Дваесет и осум проценти од испитаниците биле неутрални.
„Со зголемувањето на инфлацијата и цената на електричната енергија и другите економски предизвици со кои се соочува Северна Македонија во моментов, нашите податоци покажуваат дека луѓето не веруваат дека земјата се движи во вистинската насока“,
вели Пол Мекарти, регионален директор на ИРИ за Европа.
Според него, креаторите на политики на национално ниво ќе треба да останат фокусирани на економските прашања доколку сакаат да ги сменат овие бројки.
И покрај падот од 11 отсто во однос на ноември 2021 г., поддршката за членство во Европската Унија останува силна
Седумдесет и три отсто од македонските граѓани сакаат земјата да стане членка на ЕУ, додека 24 отсто се против.
„Многу е охрабрувачки да се види таква силна поддршка за членство во ЕУ, бидејќи има и недемократски актери кои напорно работат за да ја подобрат својата положба во земјата“,
рече Мекарти.
Анкетата покажува дека 87 отсто од македонските граѓани силно се согласуваат или донекаде се согласуваат дека силните односи со Турција најдобро и служат на интересите на земјата. Шеесет и пет проценти истото го мислат за Кина. Овие бројки претставуваат мало зголемување од претходната анкета на ИРИ, и во однос на Турција, и во однос на Кина.
Иако поддршката за влез на земјава во ЕУ е намалена, сè уште се држи високо. Довербата на граѓаните во правосудните институции, политичките партии и парламентот останува загрижувачки ниска.
Според резултатите од анкетата на прашањето кое се однесува на довербата на граѓаните во одделни институции и субјекти, судовите и судството во целина ја уживаат довербата на само четири отсто од македонските граѓани. Идентичен е процентот на граѓани кои имаат доверба во парламентот и политичките партии, додека на дното со доверба од само три отсто од граѓаните е јавното обвинителство.
Најпопуларен политичар во земјава е поранешниот премиер Никола Груевски, кој побегна во Унгарија и доби азил од тамошните власти. Груевски води со седум отсто популарност, а по него со еден процент помалку е актуелниот лидер на ВМРО-ДПМНЕ, Христијан Мицкоски, Али Ахмети е трет со шест отсто поддршка, односно еден повеќе од актуелниот премиер и лидер на СДСМ, Димитар Ковачевски.
На прашањето „За кого би гласале, доколку во недела се одржат избори во земјава“, за ВМРО-ДПМНЕ се изјасниле 19 отсто од испитаниците, за СДСМ – 11 отсто, за ДУИ – 7 отсто, а за Левица – шест отсто. Според анкетата на ИРИ, во моментот има 21 отсто на неопределени, а 12 отсто рекле дека нема да гласаат.
Анкетата е спроведена во име на Центарот за анкетни истражувања од Брима, фирма за истражување на пазарот (членка на Тејлор Нелсон Софрес и Галуп Интернешнл).
Податоците се собрани во периодот од 23 септември до 13 октомври 2022 година, со повеќестепен стратификуван примерок преку интервјуа лице-во-лице во домовите на испитаниците.
Бил анкетиран национално репрезентативен примерокот од 1 207 испитаници на возраст над 18 Податоците се пондерирани според возраст, пол, регион, населеното место (урбано/рурално) и етничката припадност. Маргината на грешка е ± 2,8 поени на ниво на доверба од 95 отсто. Стапката на одговор е 69 отсто.
Анкетата е направена со поддршка на Националниот фонд за демократија (НЕД).