На состанокот, како што соопшти владината прес-служба, се разговарало за актуелната безбедносна состојба во државата, во регионот и во поширокиот евроатлантски простор, вклучувајки ја и ситуацијата во Украина
Европската агенда е наша стратешка цел, нема да дозволиме ништо да ја загрози, истакна премиерот Димитар Ковачевски на денешната седница на Советот за безбедност (СБ) која ја свика претседателот на државата, Стево Пендаровски.
На состанокот, како што соопшти владината прес-служба, се разговарало за актуелната безбедносна состојба во државата, во регионот и во поширокиот евроатлантски простор, вклучувајки ја и ситуацијата во Украина и во тој контекст, за првите недели од претседавањето на Северна Македонија со ОБСЕ, каде што членуваат 57 земји членки, вклучувајки ја и Руската Федерација.
Посебен фокус бил ставен на добрососедските односи, кон што, Република Свеерна Македонија е искрено посветена, во духот на европските вредности.
На седницата на Советот за безбедност, премиерот Ковачевски, ја споделил оценката со претседателот на државата Пендаровски дека не смее да се дозволи, европската агенда, што е стратешка цел на нашата држава, како и билатералните односи со соседна Република Бугарија, да станат жртва на националистички и популистички политики, од која и да е страна.
„Премиерот Ковачевски, на состанокот ги посочи европските перспективи на нашата држава како прашање од значење за стабилноста и економскиот развој на Северна Македонија, но и за стабилноста и безбедноста на целиот регион и посочи на потребата од одговорно однесување од сите политички лидери и субјекти, во реализацијата на оваа државна, стратешка цел, што е очекување и на мнозинството граѓани во нашата држава“,
соопштија од Владата.
Претседателот Пендаровски, по завршувањето на седницата на Советот за безбедност изјави дека ќе ѝ предложи на Владата да им забрани влез во државава на еден пратеник од Бугарија во Европскиот парламент и на неколку други лица – државјани на Бугарија поради дејствија што претходно ги преземале и сè уште ги преземаат против нашата држава.
Односите со Бугарија, како што истакна Пендаровски, биле во посебен фокус на состанокот поради најновиот развој на настаните во односите со источниот сосед.