Лидерот на Демократскиот сојуз на Косово, Лумир Абдиџику, рече дека на состанокот не слушнале конкретен план од косовскиот премиер за решавање на кризата, „ниту подготвеност за целосна координација со меѓународните сојузници“
Лидерите на опозициските партии на Косово денеска побараа од премиерот, Албин Курти целосна координација со меѓународните партнери во врска со ситуацијата на северот на Косово, по излегувањето на претставниците на Србите од сите институциите, вклучително и од парламентот и владата.
Опозициските партии ги изнеле своите ставови и барања на состанок со косовскиот премиер, Курти.
„Во овие моменти се потребни одговорни акции кои ќе го зачуваат суверенитетот на земјата“,
изјави лидерот на Демократската партија на Косово, Мемли Красниќи по средбата.
Од друга страна, лидерот на Демократскиот сојуз на Косово, Лумир Абдиџику, рече дека на состанокот не слушнале конкретен план од косовскиот премиер за решавање на кризата, „ниту подготвеност за целосна координација со меѓународните сојузници“.
Тој оцени дека безбедносната состојба во земјата е „многу сериозна“, а координацијата со партнерите, особено со Соединетите Американски Држави, е од витално значење.
Лидерот на Алијанса за иднината на Косово, Рамуш Харадинај изјави дека Курти не „објасни зошто ги прекинал односите со Америка“.
„За мене е неприфатливо во вакви чувствителни случаи да ги раскинуваме односите со главниот безбедносен сојузник“,
рече Харадинај, кој го напушти состанокот.
Европската унија и САД побараа од премиерот на Косово да се одложи пререгистрацијата на возилата со таблички издадени од Србија за градовите на северот на Косово со мнозинско српско население. Наместо тоа, Курти излезе со трифазен план, кој започна на 1 ноември и ќе заврши во април следната година.
Според планот првин ќе се опоменуваат возачите, потоа ќе се пишуваат казни од 150 евра, а во третата фаза ќе се издаваат пробни таблички. Планирано е од април следната година да бидат во употреба само табличките со ознака РКС (Република Косово).
Но, полицајците од северот од редовите на српската заедница одбија да го спроведат овој план, поради што беше суспендиран директорот на полицијата за северниот регион Ненад Ѓуриќ.
Тоа, пак, доведе до излегување на Србите од сите косовски институции на север, како и од Собранието и Владата. За да се вратат, бараат да се укине решението за пререгистрација и да се формира Заедница српските општини.
Претставниците на САД и на ЕУ во Белград и Приштина ги повикаат Косово и Србија неодамнешните настани го загрозуваат важниот напредок постигнат во дијалогот што се води со посредство на ЕУ. Тие ги повикаа косовските Срби да се вратат во институциите, а од владата на Косово да прекине со планот за пререгистрација на возилата и да ја почне процедурата за формирање на Заедница на српските општини.