Бев принуден да ја напуштам средбата бидејќи Курти држеше предавање и не ни објасни зошто ги прекинал односите со Америка и зошто не се враќа да го исполни нивното барање. За мене е неприфатливо во вакви чувствителни случаи да ги раскинуваме односите со главниот безбедносен сојузник, рече лидерот на Алијансата за иднината на Косово
Средбата меѓу премиерот на Косово, Албин Курти, и лидерите на трите опозициски партии започна утрово, но по само пет минути претседателот на Алијансата за иднината на Косово, Рамуш Харадинај си заминал од средбата. Тој ја напуштил средбата бидејќи Курти не објаснил зошто ги прекинал односите со САД и зошто не ги исполнува нивните барања.
„Иако бев дел од средбата со премиерот Курти, бев принуден да ја напуштам бидејќи тој држеше предавање и не ни објасни зошто ги прекинал односите со Америка и зошто не се враќа да го исполни нивното барање. За мене е неприфатливо во вакви чувствителни случаи да ги раскинуваме односите со главниот безбедносен сојузник“,
рече Харадинај.
Косовскиот премиер Албин Курти ги покани на средба лидерите на трите парламентарни опозициски партии, Демократската партија на Косово (ДПК), Демократскиот сојуз на Косово (ДСК) и Алијансата за иднината на Косово (АБК) во врска со последните ситуации на северот на Косово.
Претседателот на Демократската партија на Косово (ДПК) Мемли Красниќи по средбата со премиерот на Косово Албин Курти изјави дека не е сигурен оти Владата на Косово знае во која насока ќе оди за да ја задржи ситуацијата во север под контрола.
„Го презентирав ставот на ДПК дека на Косово му требаат одговорни активности во овој момент. Што се однесува до продолжувањето на практикувањето на суверенитетот во четирите северни општини, владата мора да ги преземе активностите што и припаѓаат, а за тоа во секоја ситуација ќе ја има поддршката од ДПК“,
рече Красниќи.
Според него, ситуацијата во која влезе Косово можеше да се избегне.
„Се чини дека незрелоста во некои акции и недоволната координација со главните сојузници на Косово доведоа до ситуација што можеше да се избегне“,
додаде Красниќи.