„Особено е лицемерно лекции за морал, мир и соживот денес да делат луѓе и политички структури чие сопствено политичко минато е оптоварено со тешки настани од поновата македонска историја, како и оние што со политички одлуки овозможувале тие прашања да останат без целосна институционална разрешница. Уште помалку прифаќам медиумски центри блиски до таквите структури да организираат јавни судења и однапред да изрекуваат пресуди“, вели директорот на Агенцијата за остварување на правата на заедниците во објава на социјалните мрежи
За потсетување, Китановиќ минатата недела на Инстаграм објави фотокомпозиција, на која Ратко Младиќ е прикажан заедно со личности од српската историја, меѓу кои и Дража Михајловиќ, а со големи букви беше напишано: „Генерали на небеската војска“
Искрено му се извинувам на претседателот на Владата, господинот Христијан Мицкоски, и на членовите на Владата, кои поради мојата објава беа непотребно вовлечени во политичка пресметка и изложени на напади за нешто за кое не сносат никаква одговорност. Ова во објава на социјалните мрежи денеска го напиша дикректорот на Агенцијата за остварување на правата на заедниците, Далибор Китановиќ, откако пред три дена, со друга објава во која се глорифцира ликот на Ратко Младиќ, предизвика бурни реакции во јавноста.
Спорната објава вели дека ја избршал веднаш и оти е подготвен да поднесе одговорност за секој негов збор, но, нема, како што додава, да ја понесе одговорноста „за туѓите манипулации“ со неговите зборови.
„Нема да прифатам моето повлекување на објавата да биде претворено во признание за нешто што не сум го направил. Нема да дозволам мојата човечка пристојност да биде протолкувана како слабост. И нема да дозволам преку мене да се навредуваат ниту мојот народ, ниту мојата партија. Но на политичките мршојадци, на дежурните морални судии и на оние што туѓата болка ја претвораат во политичка муниција им порачувам: Не тргувајте со жртвите. Не градете политички кариери врз гробови. Не користете ја трагедијата на еден народ за да го навредувате другиот. И не очекувајте дека под притисок на организирана хајка ќе молчам додека преку моето име се плука по мојот народ и моите политички убедувања“,
напиша Китановиќ на социјалните мрежи.
За потсетување, Китановиќ минатата недела на Инстаграм објави фотокомпозиција, на која Ратко Младиќ е прикажан заедно со личности од српската историја, меѓу кои и Дража Михајловиќ, а со големи букви беше напишано: „Генерали на небеската војска“. Објавата на директорот предвизвика силни реакции кај дел од опозициските партии, кои, како и од граѓанскиот сектор повикаа дека на негова кривична одговорност.
Дел од опозициските партии ја обвинија власта дека го штити Китановиќ и партијата Демократска партија на Србите во Македонија (ДПСМ), и дека нема соодветен одговор за спорната објава.
Китановиќ негира дека со својата постапка сакал да навреди, понижи или да повреди припадник на кој било народ, вера или етничка заедница.
Во врска со реакциите изминатите денови, поврзани со неговата објава, вели дека станувало збор за јавно жигосување и обид за политички линч.
„Она што следуваше во изминатите денови одамна ги надмина границите на легитимната критика. Станува збор за организирана политичка и медиумска пресметка, за јавно жигосување и обид за политички линч. Од една избришана објава се конструира обвинителен акт против мене, против мојата партија, па дури и против народот на кој му припаѓам. Тоа нема да го премолчам. Особено е лицемерно лекции за морал, мир и соживот денес да делат луѓе и политички структури чие сопствено политичко минато е оптоварено со тешки настани од поновата македонска историја, како и оние што со политички одлуки овозможувале тие прашања да останат без целосна институционална разрешница. Уште помалку прифаќам медиумски центри блиски до таквите структури да организираат јавни судења и однапред да изрекуваат пресуди… Се извинувам кога некого сум повредил – и тоа го правам без задршка. Но нема да клекнам пред политички линч. Нема да се откажам од сопственото достоинство“,
вели директорот на Агенцијата за остварување на правата на заедниците.
Тој вели дека нема да се откаже од вистината за сопственото семјство. Вели дека дел од неговото најблиско семејство во Босна и Херцеговина преживеало воени околности благодарение на, како што наведува во објавата, регуларните воени единици предводени од генералот Ратко Младиќ.
„Тоа е дел од нашето лично и семејно искуство и никој нема право да бара од мене да го избришам од сопствената меморија. Но, моето лично чувство на благодарност за спасените членови на моето семејство никогаш не било, ниту ќе биде, негирање или омаловажување на туѓата болка, туѓите жртви и туѓите загуби“,
вели тој.
Во објавата тој вели дека нема да дозволи неговата човечка пристојност да биде протолкувана како слабост.
„И нема да дозволам преку мене да се навредуваат ниту мојот народ, ниту мојата партија… На крајот, над политиката, над медиумските пресуди, над моќта и над човечката суета постои суд пред кој сите сме еднакви. Над сите нас е еден Господ. И Тој, а не политичките штабови, партиските гласноговорници или медиумските инквизитори, ќе го има последниот збор“,
наведува директорот во објавата.
Спорната објава на директорот на Агенцијата за остварување на правата на заедниците беше по повод по смртта на поранешниот командант на главниот штаб на војската на Република Српска и осуден воен злосторник. Ратко Младиќ почина во четвртокот во Хаг, каде што издржуваше доживотна казна за геноцид и воени злосторства.
Владата го повика директорот да се повлече од функцијата доколку не се согласува со ставот дека Ратко Младиќ е осуден за геноцид и воени злосторства.
По ова, Демократската партија на Србите во Македонија на Фејсбук изрази поддршка за Китановиќ споделувајќи коментари од социјалните мрежи во кои се изразува поддршка за него.
На фејсбук-страницата на Демократската партија на Србите во Македонија, пак, беше објавен текст од извесна Татјана Домазет, во кој се наведува дека многу Срби го гледале Ратко Младиќ како свој генерал во времето кога се рушеле држави, се раздвојувале семејства, се губеле животи и време во кое никој не можел да знае што ќе донесе следното утро.