Кинеските власти ги информираа дипломатите за истражувањето за потеклото на ковид 19, пред објавувањето на долгоочекуваниот извештај на Светската здравствена организација (СЗО)
Асошиетед прес проценува дека денешниот брифинг е обид на Кина да го потенцира својот став за извештајот, што предизвика дипломатски пресметки
Кинеските власти ги информираа дипломатите за истражувањето чија цел беше да утрвди како коронавирусот познат како САРС Ков 2 стигнал во Вухан, местото каде првпат беше откриен, пред објавувањето на долгоочекуваниот извештај на Светската здравствена организација (СЗО).
Член на кинескиот тим и заменик – директор на Кинескиот центар за контрола и превенција на болести, Фенг Зиџијан, изјави дека експертите испитале четири можни начини на кои вирусот стигнал до Вухан.
Еден од нив е дека лилјак го пренел вирусот на човек или цицач од кој вирусот потоа бил пренесен на човек, преку замрзната храна или потекнува од лабораторија во Вухан.
По детална дискусија, експертите истражувањето го свеле на две сценарија – дека најверојатен начин за пренесување на вирусот е преку животно или евентуално преку замрзната храна.
Фенг посочи дека е најмалку веројатно е дека вирусот потекнувал од лабораторијата.
Соединетите држави покренаа прашања во врска со кинеското влијание и независноста на наодите, а Кина ги обвини критичарите за политизација на научната студија.
„Нашата намера е да ја покажеме нашата отвореност и транспарентност“,
изјави официјалниот претставник на кинеското Министерство за надворешни работи, Јанг Тао.
Тој посочи дека Кина се борела против епидемијата на транспарентен начин и дека нема што да крие.
Извештајот, чие објавување беше одложено неколку пати, се заснова на престојот на меѓународните експерти на СЗО во Вухан, каде за првпат беа пријавени инфекции со новиот коронавирус кон крајот на 2019 година.
Експертите на СЗО работеа со кинески колеги во јануари и февруари и двете страни мора да се договорат за конечниот извештај.
На брифингот во кинеското Министерство за надворешни работи присуствуваа дипломатски претставници на 50 земји и на Лигата на арапските држави и Африканската унија.
„Кина жестоко се спротивставува на обидите на некои земји да го исполитизираат прашањето за потеклото на вирусот и да изнесат неосновани обвинувања против Кина“,
се вели во соопштението на Министерството.
Портпаролката на Министерството за надворешни работи Хуа Чунијунг изјави дека истражувањето за потеклото на вирусот е научно прашање за кое стручњаците треба да соработуваат.
Таа пред новинарите изјави дека експертите сè уште разговараат за содржината и преводот на извештајот, но не прецизираше кога ќе биде објавен.
На прес-конференција подоцна денеска во Женева, експертот на СЗО Питер Бен Ембарек, кој го предводеше меѓународниот тим експерти во Кина, рече дека извештајот на скоро 400 страници е завршен и во тек се проверки на фактите и преводите.
„Очекувам дека во следните неколку дена, целиот процес ќе биде завршен и ќе можеме да го објавиме“,
рече Бен Ембарек.