Караници и навреди кон сведок, но и кон обвинителката Ивана Трајчева, можеа да се слушнат во судница на денешното рочиште за случајот „Меѓународен сојуз“. Тензичната ситуација настана во текот на сведочењето на Јованка Кухар, која била координатор во невладината организација „Меѓународен сојуз“.
„Ништо не оставаше впечаток дека еден ден ќе дојдам во судница да давам изјава. Верував дека тој ‘Меѓународен сојуз’ навистина ќе работи“,
рече Кухар во дел од сведочењето.
Таа раскажуваше дека заедно со претседателката на собранието на „Меѓународен сојуз“, Агапи Дика, биле повикувани во последен момент кога требало да се потпишуваат документи.
„Јас и госпоѓата Агапи Дика бевме злоупотребени, крајно понижени и повикувани само кога ќе требаше да се потпише нешто“,
зборуваше Кухар.
Таа се осврна и на конкретните договори што се дел од обвинението, а се однесуваат на центрите за возрасни лица потпишани со фирмите на бизнисмените Силјан Мицевски и Ардијан Амзоски.
„Конкретно за договорите со Силјан Мицевски и со фирмата ‘Дрим билдинг’, бевме информирани еден или неколку дена пред да се потпишат. Се видовме, сите тие оставија впечаток дека сакаат да градат“,
раскажуваше сведокот.
Договорите им биле читани пред да потпишаа, но, всушност, како што тврдеше, не целосно. Најголемото разочарување, рече Кухар, го доживеала кога ѝ се јавиле и ѝ рекле дека Бојан Јовановски е во притвор. Потоа, потенцираше дека стапила во контакт со Силјан Мицевски.
„Кога разговаравме со Силјан Мицевски, побарав да ми го прати договорот, ми рече ‘сега ќе се јавам кај секретарката и ќе ви го испратам’. Ми го испрати, отворам јас, нашите потписи беа на последната страница, во една точка пишуваше дека фирмата на Силјан Мицевски треба да плати околу 1 милион и 500 илјади евра, но тоа не ни беше прочитано при потпишувањето. Тоа да се прочиташе, јас ќе поставев прашање зошто толку чини“,
рече Кухар.
Таа кажа дека се обидела да стапи во контакт и со фирмата „Дрим билдинг“ на Ардијан Амзоски. На прашањата на обвинителката дали сумите на договорите им бил кажани за потпишувањето, таа одговори:
„На денот на потпишувањето на договорот не ни кажаа за суми. Бојан знаеше да ни каже ‘зарем не ни верувате?’“,
рече Кухар.
По приведувањето на Боки, кога Кухар била повикана да даде исказ во обвинителството, била контактирана од лица блиски на Јовановски.
„Откако бев повикана од јавната обвинителка, јас ѝ реков дали да одговорам сѐ. Таа рече ‘јас сум обвинител, а не политичар, ќе кажете што знаете’. Кажав сѐ што кажав. После некое време, кога беше судењето за ‘Рекет’, имав два телефонски разговори со пријатели на Бојан, еден дојде и ми кажа дека Бојан ме поздравува, му е жал што се случило ова и дека парите ќе ми ги даде во целост за 3 години и дека треба да потпишам бланко документ. Не ми беше донесен, само ме прашаа дали сакам да потпишам“,
сведочеше Кухар, која рече дека не сака да го открие името на човекот што ѝ го кажал тоа.
Обвинителката Ивана Трајчева инсистираше и се обрати до судијката Софче Гаврилова-Ефремова за да ја опомене и да го каже името.
„Сопругот на обвинетата Христина Блажевска“,
одговори потоа сведокот.
Тука настана инцидент.
„Молам“,
извика Христина Блажевска од обвинителната клупа.
И таа и Бојан Јовановски почна да дофрлаат, судијката опоменуваше, но залудно. Блажевска дофрлаше дека Кухар е дојдена денеска да зборува под присилба, а во еден момент се обрати и кон обвинителката.
„Што ме гледаш“,
ѝ рече Блажевска на обвинителката и додаде дека сака да излезе, зашто ако останела во судница да го слуша ова, како што рече, нема да молчи.
Бојан Јовановски исто така не молчеше.
„Лажову“,
извикуваше кон Кухар.
Судијката Софче Гаврилова-Ефремова даде пауза од 15-ина минути за да се смират странките, сведокот беше повлечен во друг дел од судската зграда, а во ходникот пред судница имаше уште неколку слични дофрлања од Блажевска кон обвинителката.
Судењето продолжи по паузата и Кухар раскажа дека на тоа што рекла дека не сака да потпише бланко документ немало реакција од сопругот на обвинетата и токму затоа не ни сакала да го спомене со име. На прашање на обвинителката дали имала друг контакт со него или со Блажевска, сведокот почна да одговара дека сопругот на обвинетата ѝ се јавил повторно.
„Нема врска ова со обвинението, зошто ја прашува такво нешто“,
се уфрли обвинетата.
Судијката повторно ја опомена, а Кухар продолжи да раскажува дека во тој разговор ѝ било кажано дека адвокатот на Јовановски, Сашко Дукоски, сакал да се види со неа.
„Јас прашав зошто, тој ми рече ‘не знам, ќе се видите и ќе поразговарате.’ Јас се расплакав во тој момент и им реков ‘заборавете ме и мене и мојот телефонски број’“,
рече Кухар.
Претходно, сведокот раскажуваше и дека на некој начин била зависна од обвинетиот Јовановски поради тоа што тој требало да ѝ врати пари кои ги споменуваше во текот на сведочењето. Раскажа дека сѐ започнало во 2014 година кога случајно го запознала Јовановски. Тогаш таа продала еден стан во Скопје за 100 000 евра, а потоа продала уште еден во главниот град за 50 000, како и трет стан во Словенија за 100 000 евра. Бојан, според неа, ја убедил да даде пари за да инвестираат во странство, за што често преку него разговарале телефонски со женско лице, кое наводно им ги пренесувала информациите за лицата во странство.
Кухар рече дека речиси сите пари му ги дала на Јовановски. Оттогаш таа тврдеше дека живеела под кирија, а Боки месечно ѝ давал пари, околу 2 000 евра. Така, вкупно ѝ вратил околу 80 000 евра, но остатокот од парите не ѝ се вратени. На прашања на адвокатот Дукоски, пак, дали за парите што му ги дала на Јовановски уште во 2014 некогаш покренала некаква постапка пред суд, Кухар одговори дека за случајот ангажирала адвокат пред една година.
Во овој предмет Бојан Јовановски – Боки 13 се товари за делата измама и перење пари, Јасна Мандиќ-Ерцеговиќ и Христина Блажевска се обвинети за помагање во овие дела, а Фросина Ременски за помагање само во делото измама. Таткото на Боки, Миле Јовановски, се товари за помагање во перењето пари и за делото неовластено изработување, држење, посредување и тргување со оружје бидејќи при претрес во неговиот дом биле пронајдени три полуавтоматски пиштоли и муниција за кои немал дозвола. Како правно лице обвинета е и невладината организација.
Во овој предмет обвинителството тврди дека двајцата бизнисмени Силјан Мицевски и Ардијан Амзоски биле доведени во заблуда и измамени со сума од околу еден милион евра – Мицевски сума од 719 905, а Амзоски 233 821 евра.