Досега собраниската комисија даде поддршка за кандидатката Татјана Васиќ-Бозаџиева и за Фатмир Скендер кои се предложени од владејачките партии
Собраниската Комисија за прашања на изборите и именувањата денеска не го утврди предлогот судијата во пензија, Бранко Секуловски, да биде судија во Уставниот суд на Република Северна Македонија. Поддршка за да стане уставен судија не доби и судијката од Управниот суд, Весна Јовановска.
Денеска и предлог-кандидатот за уставен судија Тодор Витларов, предложен од ВМРО-ДПМНЕ, не ја доби поддршката од собраниската Комисија да биде судија во Уставниот суд.
Од шестeмина кои се предлози од ВМРО-ДПМНЕ, покрај Секуловски, Јовановска и Витларов, досега е одбиена кандидатурата и на универзитетската професорка Родна Живковска. Предлози на опозицијата се и универзитетскиот професор Саво Климовски и Војислав Димовски јавен обвинител од Основното јавно обвинителство во Охрид.
Пратениците досега, освен за кандидатката Татјана Васиќ Бозаџиева, која работи во Министерството за правда како државен советник за граѓанско законодавство, дадоа поддршка и за кандидатурата на граѓанскиот судија во Апелациониот суд во Скопје Фатмир Скендер. Тие, како и републичкиот јавен обвинител Љубомир Јовески, се предложени од владејачките партии.
Седницата ќе продолжи со расправа за останатите кандидати, поточно кандидатот Војислав Димовски.