Властите во земјите од опкружувањето преземаат серија мерки за ограничување на движењето на граѓаните, со цел да се спречи поголемо ширење на заразата
Во Грција уапсени 127 лица
Од 12 март до вчера во Грција биле регистрирани 122 прекршувања на превентивните мерки за спречување на ширењето на коронавирусот и биле уапсени 127 лица.
Како што соопштија од грчката полиција, најголем број од прекршувањата биле во саботата, кога во 86 случаи биле уапсени 90 лица. Во текот на вчерашниот ден бројот е речиси трипати помал, било регистрирано едно прекршување и се уапсени 31 лице.
Најголем број од прекршувањата – 48, се во областа Атика, поширокиот регион на Атина. Уапсените лица од цела Грција не ги почитувале забраните, кои се однесуваат на фризерски салони, кафулиња, ресторани, таверни, фурни, слаткарници и сл.
*поврзана вест: Грција: Уапсени сопственици на локали што не ги почитувале мерките за коронавирусот
Стопиран е целиот јавен живот во Словенија
Со одлука на словенечките власти, како мерка во борбата против коронавирусот, од утрово е стопиран целиот јавен живот во земјата.
Затворени се училиштата, градинките, сите културни и спортски установи, јавниот градски превоз, домашниот и меѓународниот железнички превоз и сите услужни објекти каде што може да има контакт меѓу луѓе, како фризерски и козметички салони.
Портпаролот на Кризниот штаб за справување со коронавирусот Јелко Кацин најави дека од утре ќе се затворат и аеродромите во земјата, со што ќе се стопира и воздушниот сообраќај.
„Ова е крај за локалите, крај на дружењата, а државата ќе се погрижи за да разбереме зошто мораме да се грижиме за себе и за другите. Мораме да почнеме да се грижиме за себе“,
изјави Кацин.
Во однос на превозот, најавено е дека нема да бидат укинати такси -возилата, но таксистите имаат обврска после секој патник да направат комплетна дезинфекција на возилото, а полицијата строго контролира дали тоа се почитува. Градоначалникот на Љубљана, Зоран Јанковиќ, изјави дека од утринава сите паркинг-места низ градот ќе бидат бесплатни со цел да се компензира неработењето на јавниот превоз.
*поврзани вести : Прва жртва од коронавирусот во Словенија
Полициски час и во Србија ако не се почитуваат препораките
Српската премиерка Ана Брнабиќ изјави дека ако не се почитува препораката на владата постарите граѓани да останат дома, ниту една мерка нема да донесе резултати. Таа рече дека ако и натаму има толку многу луѓе на улиците, ќе следува воведување полициски час.
Брнабиќ на ТВ Прва изјави дека постојат планови пензиите на пензионерите да им се достават дома, како и да се одложи плаќањето на сметките без плаќање на камати.
*поврзана вест: И Србија во карантин – Вучиќ прогласи вонредна состојба