fbpx
Македонија

Како заседаваат парламентите во ЕУ, а како ќе работи македонскиот додека се влошува ковид-кризата…

Александра М. Митевска | 13 октомври, 2020 11:30

Во случај да се зголеми бројката на пратеници што се во изолација, во наредниот период би можело да биде доведено во прашање донесувањето на ребалансот на буџетот и на задолжувањата што треба да се спроведат со цел надминување на последиците од епидемијата

Анализа на Парламентарниот институт укажува дека националните парламенти во ЕУ усвоиле различни пристапи за алтернативно функционирање во услови на пандемија. Некои се одлучиле за целосен дигитален пристап, а други за мерки за социјално дистанцирање

На денешната редовна координација на спикерот Талат Џафери со координаторите на пратенички групи ќе се бараат модалитети за понатамошното функционирање на парламентот во услови на епидемија, откако искрсна новата „вонредна ситуација“ со двајца пратеници од мнозинството кои се позитивни на ковид-19.

Засега не се создадени формални услови за и македонскиот парламент да функционира онлајн, на што се противи и опозицијата, наспроти искуствата во други европски земји кои во изминатите месеци усвоија различни пристапи за непречена работа на законодавната власт во услови на пандемија на коронавирус.

Според анализата на Парламентарниот институт во македонското Собрание, начинот на организирање на парламентарната функција варира од држава до држава:

ШПАНИЈА – Сенатот и Конгресот имаат можност за гласање од далечина, преку употреба на електронски средства за пленарните сесии. Тоа е овозможено преку измени на членови од деловниците на двата дома, донесени во 2011, односно во 2013 година. Гласањето од далечина е дозволено само за пленарни сесии, не и за комисиски расправи, а до почетокот на ковид-кризата тоа се применувало само во одредени околности, поради породилно отсуство, бременост, сериозно заболување… на пратеник.

ИТАЛИЈА – Се води дебата за организирање на работата на пратениците преку нивно сместување во различни згради за да се обезбеди физичка дистанца. Другата варијанта е да се овозможи гласање во смени. Деловниците за работа на двата дома на италијанскиот парламент забрануваат гласање од далечина, што не е во согласност ниту со членот 64 од италијанскиот Устав.

ГЕРМАНИЈА – Во Бундестагот постапката не е дизајнирана за да им овозможи на пратениците да гласаат од далечина. Иако со Деловникот се бара присуство на половина од членовите, согласно со новонастанатата ситуација со ковид-19, овој праг ќе се намали значително, така што кворум ќе може да се обезбеди и со присуство на една четвртина од пратениците. Новиот член што за оваа цел треба да се додаде во Деловникот ќе може да се отповика во секое време, затоа што новите процедури се засноваат на консензус меѓу политичките партии.

РОМАНИЈА – Уште во почетокот на пандемијата во Европа, во март годинава, парламентот во Букурешт донесе одлука за изменување на внатрешните правила, за функционирањето на парламентот да се спроведува преку електронски средства, во исклучителни околности, како епидемии, природни непогоди или терористички настани… Уште кон средината на март парламентот почна со употреба на новата онлајн-платформа која овозможува гласање од далечина.

ПОЛСКА – Исто така, уште во март претседателството на полскиот Сејм усвои резолуција за промена на начинот на постапување во време на ризик од епидемија или вонредни состојби предвидени со Уставот. Во период на епидемија само ограничен број пратеници од секоја група ќе бидат физички присутни во Сејмот, а сите други ќе може да учествуваат во работата преку видеоврска што ќе обезбеди потврда на идентитетот на секој пратеник.

ФРАНЦИЈА – Деловниците за работа на Националното собрание и на Сенатот пропишуваат физичко присуство на членовите, а не постојат одредби за гласање од далечина. И двата дома им овозможуваат на своите членови да гласаат преку полномошник во специфични околност. Сепак, за да се приспособи на ковид-кризата, Националното собрание се согласило со специфични методи на работа, кои вклучуваат суспендирање на сите тековни активности, освен донесување закони за итни случаи, намален формат на седници, ограничен број на присуства – по три лица од пратеничка група.

На почетоците на ковид-кризата во земјава, македонскиот парламент не функционираше затоа што тогашниот состав беше распуштен уште на 16 февруари. Набрзо, пак, по изборите и конституирањето на новиот собраниски состав, кој сега заседава во друга сала, со цел да се обезбеди поголемо растојание меѓу пратениците, беше најавена платформа за онлајн-работа на законодавниот дом.

И македонските парламентарци се спремаат за гласање од дома и за работа во вонредна состојба

Во меѓувреме, се случи првото осипување на парламентарното мнозинство, за време на изборот на новата влада, кога пратеникот на ДУИ, Арбен Зибери, како суспектен на ковид-19 гласаше во посебна кабина.

Пратеникот Арбен Зибери гласаше во посебна кабина, како суспектен на ковид-19

Викендов, пак, беше потврдено дека дека двајца пратеници од мнозинството се позитивни на ковид-19, така што времено се спречени да ја извршуваат пратеничката функција. Со тоа се доведено во прашање нормалното функционирање на парламентот во наредниот период и капацитетите на мнозинството да обезбеди кворум за работа.

Со ребалансот ќе се купува време за комплетирање на собраниското мнозинство

Според министерот за здравство Венко Филипче, пратениците треба да се реорганизираат и да работат од дома, додека не стивне пандемијата. 

Филипче смета дека Парламентот треба да работи онлајн

Но опозициската ВМРО-ДПМНЕ од старт се спротивставува на можноста парламентот да заседава од далечина, со образложение дека тоа би било противуставно.

ВМРО-ДПМНЕ против онлајн работа на Собранието: Нема причина за егзибиции

©2024 360 степени, Сите права се задржани