Градоначалниците да бидат поодговорни кога даваат изјави и да престанат да лажат, особено поради тоа што веќе постои сомнеж за извршување кривично дело против животната средина од нивна страна бидејќи ниту Општина Аеродром ниту, пак, Кисела Вода немаат потпишан договор за депонирање смет во депонијата „Дрисла“, односно нивните претходни договори им се истечени во март годинава, велат од Јавното претпријатие
Откако доцна синоќа градоначалниците на скопските општини Аеродром и Кисела Вода по неколкучасовно чекање пред портите на ЈП „Дрисла“, кое резултира со неуспех да се депонира собраното ѓубре во депонијата, го оставија сметот пред портите, со тврдење дека како општини имаат уредни договори за да влезат во депонијата. Денеска од јавното претпријатие преку соопштение ги демантираат изјавите на двајцата градоначалници.
Од ЈП „Дрисла“ велат дека договорите на двете скопски општини се истечени уште во март годинава, па затоа, како што велат, се отвора прашањето каде овие општини го фрлале сметот во изминатите месеци ако веќе четири месеци немаат договор, иако единственото предвидено место за одложување отпад во Град Скопје е токму депонијата „Дрисла“, а воедно прашуваат и дали како резултат на немањето договори овие општини создале нови диви депонии?
„Ги замолуваме градоначалниците од општина Кисела Вода и општина Аеродром да бидат поодговорни кога даваат изјави и да престанат безочно да лажат, особено поради тоа што веќе e креиран сомнеж за извршување кривично дело од нивна страна против животната средина. Колку од дивите депонии кои ги исчисти градот Скопје повторно се претворени во хаос со отпад“,
велат од ЈП „Дрисла“.
Инаку, по комуналниот „крах“ на Скопје поради штрајк на вработени во јавното претпријатие, градоначалниците на ВМРО-ДПМНЕ вчеравечер се самоорганизираа и почнаа со чистење на општините со кои раководат. Меѓу нив и градоначалникот на Аеродром, Тимчо Муцунски и градоначалникот на Кисела Вода, Орце Ѓорѓиевски, кои со камионите со смет од нивните општини се упатија кон депонијата „Дрисла“ и оттаму преку пренос во живо доцна синоќа обвинија дека не им се дозволува да го депонираат ѓубрето.
Градоначалникот Муцунски тврди дека безброј пати го побарал директорот на „Дрисла“, но тој не одговорил на неговите повици.
„Имаме опција ѓубрето да го вратиме во градот Скопје, бидејќи на ниту една општина не и е дозволено ѓубрето да влезе во ’Дрисла’ – депонија за која сите имаме уредни договори. Подготвени сме да платиме, иако немаме обврска за тоа. Помеѓу опцијата да го вратиме ѓубрето во градот и да е предмет на потенцијална зараза, ние одбираме друга опција“,
рече Муцунски во јавување пред капијата на „Дрисла“ синоќа.
Градоначалникот на Кисела Вода дополни дека повеќе од час и половина не им било дозволено да го депонираат отпадот внатре во „Дрисла“, по што, како што рече тој, на своја одговорност двајцата градоначалници одлучиле да го истоварат сметот пред депонијата.
„Нашите вработени ќе го одложат ѓубрето овде, пред ’Дрисла’, на цела одговорност на Тимчо и моја лично. Ние стоиме зад ова затоа што не можеме да дозволиме градот и нашите општини да тонат во ѓубре. Жалам што некој нема разумност во овие моменти да ја отвори капијата и да дозволи да влезат камионите и покрај тоа што реагиравме и до Управниот одбор и до директорот. Тие што се одговорни на смена се сокрија, односно добија наредби да не се појавуваат тука, така што ние друга опција немаме“,
кажа Ѓорѓиевски.