Поради штрајкот на вработени во јавното претпријатие „Комунална хигиена“, контејнерите во Скопје цел викенд се преполнуваат. Затоа, дел од градоначалниците на скопските општини најавија дека самите ќе го расчистат сметот
По комуналниот „крах“ на Скопје поради штрајк на вработени во јавното претпријатие, градоначалниците на ВМРО-ДПМНЕ вчеравечер се самоорганизираа и почнаа со чистење на општините со кои раководат.
Меѓу нив и градоналникот на Аеродром, Тимчо Муцунски и градоначалникот на Кисела Вода, Орце Ѓорѓиевски, кои со камионите со смет од нивните општини се упатија кон депонијата Дрисла и оттаму преку пренос во живо доцна синоќа обвинија дека не им се дозволува да го депонираат ѓубрето.
Градоначалникот Муцунски тврди дека безброј пати го побарал директорот на Дрисла, но тој не одговорил на неговите повици.
„Имаме опција ѓубрето да го вратиме во градот Скопје, бидејќи на ниту една општина не и е дозволено ѓубрето да влезе во Дрисла – депонија за која сите имаме уредни договори. Подготвени сме да платиме, иако немаме обврска за тоа. Помеѓу опцијата да го вратиме ѓубрето во градот и да е предмет на потенцијална зараза, ние одбираме друга опција“,
рече Муцунски во јавување пред капијата на Дрисла синоќа.
Градоначалникот на Кисела Вода дополни дека повеќе од час и половина не им било дозволено да го депонираат отпадот внатре во Дрисла, по што, какошто рече тој, на своја одговорност, двајцата градоначалници одлучиле да го истоварат сметот пред депонијата.
„Нашите вработени ќе го одложат ѓубрето овде, пред Дрисла, на цела одговорност на Тимчо и моја лично. Ние стоиме позади ова затоа што не можеме да дозволиме градот и нашите општини да тонат во ѓубре. Жалам што некој нема разумност во овие моменти да ја отвори капијата и да дозволи да влезат камионите и покрај тоа што реагиравме и до Управниот одбор и до директорот. Тие што се одговорни на смена се сокрија, односно добија наредби да не се појавуваат тука, така што ние друга опција немаме“,
кажа Ѓорѓиевски.
Вчеравечер беше тензично и пред јавното претпријатие „Комунална хигиена“. Директорката Косана Мазнева Николиќ се појави пред вработените кои неколку дена штрајкуваат и меѓу другото бараат нејзина смена.
На скандирањата „оставка!“, директорката одговори: „Вие вечер ќе работите“?
Штрајкот на вработените почна на 7. јули. Како главна причина тие го наведуваат отпуштањето на дел од работниците во претпријатието.
Другите барања се зголемување на платите, исплата на К-15 и бенефициран работен стаж.
Поради штрајкот, контејнерите во Скопје цел викенд се преполни. Затоа, дел од градоначалниците на скопските општини најавија дека самите ќе го расчистат сметот.
Арсовска го обвини Мицкоски за Комунална хигиена, ВМРО-ДПМНЕ бара да се преиспита нејзината деловна способност
Доцна синоаќа, по седница на Кризниот штаб, градоначалничката Данела Арсовска кажа дека Комунална хигиена е ставена во нормала и оти се надева дека од денеска ќе почне да работи со целосен капацитет.
Таа изјави дека проблемите во претпријатието со политички инструирани од, како што ги нарече, мафијашки и бандитски структури. Зад целата ситуација, според неа, стои лидерот на ВМРО-ДПМНЕ, Христијан Мицкоски, кого го стави во редот „политичари кои се најголемото ѓубре“.
Од ВМРО-ДПМНЕ бараат Арсовка да си даде оставка и порачаа оти треба да се преиспита нејзината деловна способност.
„Ја разбираме специфичната состојба во која се наоѓа Данела Арсовска, иако не ја оправдуваме истата. Веројатно ѓубрето е помалиот дел од проблемот, туку личноста со слицни карактеристики на него, која го води градот. Оттука изразуваме сериозен сомнеж за деловната способност на Арсовска да го води градот. Нема претпријатие кое не го упропасти, а последниот случај покажа дека ЈП Комунална хигиена може да работи само во тесна соработка со полицијата на Спасовски. Данела Арсовска потребно е да си даде оставка и да престани да го измачува Скопје“,
велат од ВМРО-ДПМНЕ.
Инаку вчеравечер и претседателот на ВМРО-ДПМНЕ, Христијан Мицкоски, беше на терен со градоначалниците од редовите на неговата партија. Тој порача надлежните да бидат „над ситуацијата“, а за проблемот со сметот во кој се дави главниот град да помогне и Владата.
*ПОВРЗАНА ВЕСТ: „Состојбата во Центар е алармантна“ – објави градоначалникот и најави дека општината сама ќе го расчистува сметот од преполните контејнери
*ПОВРЗАНА ВЕСТ: ВМРО-ДПМНЕ и СДСМ со меѓусебни обвинувања за ѓубрето во Скопје – кој е одговорен за хаосот, а кој за чистењето