Градоначалничката на Скопје, по вечерашната седница на Кризниот штаб свикана поради ситуацијата во ЈП „Комунална хигиена“, изјави дека проблемите во претпријатието со политички инструирани од, како што ги нарече, мафијашки и бандитски структури. Зад целата ситуација, според неа, стои лидерот на ВМРО-ДПМНЕ, Христијан Мицкоски, кого го стави во редот „политичари кои се најголемото ѓубре“.
„Мафијашки структури неколку дена ја блокираат работата на Комунална хигиена и тоа поради лични интереси. Станува збор за луѓе кои повеќе од 15 години работеле само трета смена што е спротивно на законот. Тие воопшто не се појавувале на работните места и не ги извршувале работните обврски. Сега дел од нив ја блокираа работата на претпријатието и ги блокираа другите 1 300 да ги извршуваат своите обврски… Вчера, ниту инстуциите не успеаја да ја прекинат оваа незаконска блокада на претпријатието, што е уште еден сигнал дека правната држава не функционира. Од овие причини ставен е во функција кризниот штаб на скопските јавни претпријатија кој треба да ја одржува хигиената и истите се излезени на терен и чистат. Комунална хигиена е ставена во нормала и се надеваме дека од утре ќе работи со целосен капацитет. Град Скопје нема да дозволи партиските интереси на мафијашите и бандидите да бидат пред интересите на граѓаните. Заврши времето кога овие градски претпријатија беа третирани како нечија лична сопственост. Сакам да му порачам на Христијан Мицкоски дека е разобличен вечерва зашто сака за ефтини поени сака да креира проблеми кај граѓаните, а потоа да се претставува дека ги решава тие проблеми. Таквите политичари се најголемото ѓубре кое го видел овој град и ние вечерва ќе почнеме, со чистењето на ѓубрето, да ги чистиме и нив“,
изјави Данела Арсовска по вечерашниот состанок на Кризниот штаб на Градот.
Претходно, полицијата успеа да ја деблокира зградата на Комунална хигиена и неколку камиони излегоа од дворот и се упатија кон Скопје за да ги празнат преполните контејнери.
Ситуацијата пред претпријатието беше тензична. Директорката на ЈП „Комунална хигиена“, Косана Мазнева Николиќ, се појави пред вработените кои неколку дена штрајкуваат и меѓу другото бараат нејзина смена. „Оставка, оставка“, се слуша како скандираат вработените.
Директорката на тоа одговорила: „Вие вечер ќе работите“?
Штрајкот на вработените почна пред два дена. Како главна причина тие го наведуваат отпуштањето на дел од работниците во претпријатието. Другите барања се зголемување на платите, исплата на К-15 и бенефициран работен стаж.
Поради штрајкот контејнерите во Скопје со денови се преполни. Затоа, дел од градоначалниците на скопските општини најавија дека самите ќе го расчистат сметот.