Ескалацијата на израелските закани за инвазија на Рафах, кое е последното засолниште за околу милион цивили што претходно се засолнија таму, поттикна многумина да заминат во крајбрежната област Ал-Маваси или да се обидат да се пробијат до точките на север
Израел изминатото деноноќие ги засили воздушните напади врз Рафах, во кои загинаа најмалку шест Палестинци, пренесува Ројтерс.
Израелските воени сили со месеци предупредуваат на ваква офанзива во Рафах. Оваа воена операција ја сметаат за неопходна, со цел да бидат уништени и последните баталјони на Хамас. Се претпоставува и дека во Рафах се наоѓаат заложниците кои на 7 октомври лани беа заробени за време на нападот на Хамас врз Израел.
И покрај предупредувањата до Израел и најавите да се евакуираат цивилите од пограничниот град во Газа, израелските сили продолжија со бомбардирањето на северните и централните области, како и источно од градот Кан Јунис.
Израел многупати досега рече дека ќе продолжи да ги реализира плановите за сеопфатен напад врз засолништата на Хамас во Рафах, на јужната граница со Египет.
Ескалацијата на израелските закани за инвазија на Рафах, кое е последното засолниште за околу милион цивили што претходно се засолнија таму, поттикна многумина да заминат во крајбрежната област Ал-Маваси или да се обидат да се пробијат до точките на север.
Но, бројот на оние што заминуваат од Рафах е мал, особено зашто сметаат дека ниту едно место не е безбедно.
Рафах се наоѓа на самиот југ на Појасот Газа, на границата со Египет, а денес е дом на повеќе од милион бегалци кои побегнаа таму од израелската офанзива на север.
Досега најмалку 32 000 Палестинци се убиени во израелските напади врз Газа, соопшти тамошното Министерство за здравство. Се верува дека уште илјадници се мртви под урнатините. Во средата вечерта тројца Палестинци загинаа, а четворица се повредени на окупираниот Западен Брег, во напад на израелската армија врз Џенин, соопшти во средата Министерството за здравство.