Поранешниот градоначалник на општина Аеродром од ВМРО-ДПМНЕ, Ивица Коневски поднел тужба за клевета против портпаролот на неговата матична партија, Наум Стоилковски. Коневски е навреден од статуси на социјалните мрежи на портпаролот, за кој вели, работи за Христијан Мицкоски.
„Денеска поднесов тужба за клевета против портпаролот на Христијан Мицкоски, Наум Стоилковски, кој е финансиран од партијата да шири лаги во интерес на неговиот шеф. Мицкоски на тој начин посегна по моја лична дискредитација, а тоа ја покажува единствено неговата немоќ да се соочи со конструктивните критики кои му ги упатив по изборниот пораз. Тој, со ваквото однесување, уште еднаш потврди дека нема никаква почит кон сите досегашни функционери на партијата, мои почитувани сопартијци, како и кон оние кои недвосмислено и со најискрени намери побараа негова оставка од претседателската функција по неуспехот што го доживеа на парламентарните избори“,
вели Коневски.
Стоилковски пишуваше дека во спорната зграда кај Мајчин дом во Аеродром, Коневски има стан и деловен простор над 350м2 и затоа не ја критикува актуелната власт.
*поврзана вест: Стоилковски по тужбата од Коневски: Ќе треба да ја докаже клеветата
Коневски пак, очекува јавно извинување од портпаролот Стоилковски, а на Мицкоски повторно му порачува да си замине од претседателското место на партијата.
„Сакам да верувам и дека Мицкоски на крај ќе го одржи дадениот збор пред целата македонска јавност, ќе покаже минимум доблест, достоинство, морален и демократски капацитет и сам ќе си замине од претседателското место на партијата“,
додава Коневски.
По изборните резултати, екс градоначалникот Коневски и други поранешни функционери на ВМРО-ДПМНЕ повеќепати му порачаа на Мицкоски да ја напушти претседателската позиција во партијата.
Мицкоски пак, на прославата на Илинден од Ташмаруништа остро ги нападна сите оние кои бараат оставка од него и од членовите на раководство, нарекувајќи ги јаничари на власта и товар на партијата.