Презентацијата, велат од Владата, јасно покажа дека со предлогот за наставен предмет општествени науки не се укинува предметот историја, туку содржините од него се предвидува да станат задолжителен дел од новата програма
Да се спроведе исцрпна јавна расправа, со активно учество на Министерството за образование и наука и на Бирото за развој на образованието, и низ максимално инклузивен процес на сите засегнати страни да се дојде до најдобри решенија и висока согласност за најавениот концепт за основно образование. Исто така, треба да се појаснат некои од прашањата што ги имаат граѓаните, наставниците, родителите и учениците за најавената нова концепција за образование.
Тоа, како што соопштија од Владата, се заеднички заклучоци од денешната седница, по презентацијата на нацрт – концепцијата за основно образование.
Презентацијата, велат од Владата, јасно покажа дека со предлогот за наставен предмет општествени науки не се укинува наставниот предмет историја, туку содржините од него се предвидува да станат задолжителен дел од новата наставна програма. Се посочува и дека новиот концепт не предвидува намалување на бројот на наставниците по историја, географија и граѓанско образование, туку дека продолжуваат заеднички да ја планираат наставата, со цел учениците да добијат најдобро можно знаење на најефикасен начин.