Институтот за историја забележува што тој е донесен на целосно нетранспарентен начин, без консултација ниту со Институтот или други високошколски установи, ниту со научната и професионалната јавност
Институтот за историја при Филозофскиот факултет во Скопје денеска преку соопштение го отфрли концептот за реформи во образованието на Министерството за образование и наука и Владата и бара да го повлечат и да ги прекинат сите активности во врска со предметот Историја.
Во писмената реакција, што во целост на објави МИА, овој Институт наведува три елементи поради кои за нив ваквиот концепт е неприфатлив.
„Таканаречениот ‘Концепт’ што го нуди МОН е донесен на целосно нетранспарентен начин, без консултација ниту со Институтот или други високошколски установи, ниту со научната и професионалната јавност. Институтот цени дека е скандалозно да се влечат вакви сериозни потези без воопшто и да се информира – а не пак да се побара совет од струката, од која утреден ќе се бара планираното да го спроведе во дело, во училишните клупи“,
е првата забелешка на Институтот.
Вториот елемент што го посочуваат е како што велат „идејните творци на концептот не само што немаат компетенции да го реформираат начинот на кој една научна дисциплина се доближува до учениците, туку покажуваат и елементарно непознавање на материјата која мислат дека ја реформираат“, нарекувајќи го дилетантски потег, кој како и сите досегашни се однапред осудени на пропаст.
„Т.н. ‘Концепт’ предвидува интегрирање на историјата со науки од сосем различен вид во миг кога македонската историја, македонскиот јазик, и македонскиот идентитет воопшто, се безмилосно нападнати и неосновано оспорени однадвор. Во еден ваков несреќен момент, секое продолжување на замислената интеграција може да се протолкува како внатрешно институционално содејство со надворешни желби и притисоци“,
посочуваат во соопштението во кое на крајот стои дека зад него едногласно стои Институтот за историја.
Министерката за образование и наука Мила Царовска пред два дена на прес- конференција го најави новиот концепт на основно образование, кој ќе вклучи спојување на повеќе предмети во еден, како што се историја и географија, или биологија и хемија, е со цел децата да учат помалку факти, а повеќе да размислуваат и да поврзуваат.
Ова предизвика негативни реакции во јавноста, дека се укинуваат предмети, на што МОН појасни дека се работи за целосно нов модел на настава во кој ниту една научна дисциплина нема да се изгуби, туку ќе се смени концептот на кој учениците го изучуваат материјалот.