Пазарниот инспекторат најавува засилени контроли во Охрид и казни за непочитување на мерките за ковид-19.
Во изјава за ТВ Алсат, директорот на инспекторатот Стојко Пауновски ги посочува и најавените концерти во градот, кои вели инспекторите будно ќе ги следат.
„Ќе се врши контрола и на концертите кои наредните денови ќе се одржуваат во Охрид..Ако влезе и еден посетител повеќе ќе следуваат казни за организаторите“,
вели Пауновски за ТВ Алсат.
Засилени контроли за мерките на ковид-19 пред неколку дена најави и Општинскиот кризен штаб.
Од таму апелираа дека ако организаторите на настани не можат да ги запазат мерките за ковид-19, да се откажат од настаните. Засилени инспекции беа најавени и за плажите.
Сепак, на социјалните мрежи и натаму се споделуваат фотографии и снимки од градот, на кои се гледаат собири на граѓани, на кои ниту се почитува дистанцата, ниту се носат заштитни маски.
Здравствените власти алармираа дека неодговорното однесување може да предизвика раст на заболени од ковид-19, посочувајќи дека „вирусот не е на одмор“.
Освен мерките за ковид-19, пазарниот инспекторат ги испитува и злоупотребите ваучерите за туризам, кои дел од граѓаните наместо да ги користат, ги препродаваат.