Ако има време за кафеаните во Дебар Маало, за фитнес или за прошетки на Водно, мора да одвои време и за отчет пред со сопартијците кои му ја дадоа довербата, велат иницијаторите на вонредниот конгрес на ВМРО-ДПМНЕ
Доколку Мицкоски е убеден дека добро ја водел партијата и дека резултатите што ги постигнал се максимумот, тогаш нема причина да се плаши и да бега од соочување со сопартијците, велат од Иницијативниот одбор, кој закажа вонреден конгрес на ВМРО-ДПМНЕ и бара отчет и повлекување од партискиот лидер.
Вонредниот конгрес закажан за 28 март, велат тие, е добра можност да се дискутира за партиските проблеми, но и за можноста за сплотување на партијата, а делегатите, нагласуваат, заслужуваат да добијат отчет од Мицкоски.
„На 23 декември 2017 година во Валандово, 376 делегати му ја дадоа довербата на сè уште актуелниот претседател Христијан Мицкоски да ја врати ВМРО-ДПМНЕ на победнички патеки. Овие три години Мицкоски не само што не ги обедини партиските структури и што не донесе нова енергија, туку дополнително ја раскара и подели ВМРО-ДПМНЕ. Тоа се одрази на изборните резултати, а партијата од 455 000 гласа на парламентарните избори во 2016 година падна на 315 000 гласа минатата година“,
велат од Иницијативниот одбор.
Тие додаваат дека ако Мицкоски има време да ги полни кафеаните во Дебар Маало, за фитнес или за прошетки на Водно, мора да одвои време и да се соочи со сопартијците кои му ја дадоа довербата.
Актуелното раководство на ВМРО-ДПМНЕ, пак, во меѓувреме исто така закажа конгрес, но редовен и во ноември. Оттаму изминатите денови, пак, им возвраќаа на членовите на Иницијативниот одбор дека соработуваат со Зоран Заев и нивната цел е да ја дефокусираат јавноста од реалните проблемите во државата со кои власта не може да се справи.