Се прават интензивни меѓународни напори да ѝ се помогне на Индија за да се справи со драматичната ситуација со ковид-19 откако изминатите денови земјата забележа рекорди според бројот на новозаразени, здравствениот систем се оптовари и не може да ги прима сите пациенти, а се соочува и со недостаток на боци со кислород.
Се очекува Индија да добие помош од земјите од ЕУ, што веќе го најави претседателката на Европската комисија (ЕК), Урсула Фон дер Лајен. Таа соопшти дека ЕУ е загрижена за ситуацијата и е подготвена да помогне и веќе го мобилизирала механизмот за цивилна заштита на Унијата.
„Би-би-си“ јавува дека и Велика Британија веќе испраќа помош, како што се вентилатори и боци со кислород. САД, пак, ќе ја укинат забраната за испраќање суровини во странство со цел да овозможи Индија да набави повеќе вакцини од „Астра Зенека“.
Индискиот премиер, Нарендра Моди, денеска ги повика сите граѓани во земјата да се вакцинираат и да бидат внимателни нарекувајќи го овој бран од коронавирусот „бура од зараза“.
Само во последните 24 часа бројот на инфекции со коронавирус се зголеми за нови 349 691 случаи, што претставува нов црн рекорд во земјата, четврти ден по ред.
За да се намали притисокот на болниците кои не можат да примаат нови пациенти, во главниот град Делхи, е продолжен карантинот, а индиската влада го одобри планот за пуштање на 500 постојки за производство на боци со кислород.