Состојбата со коронавирусот во Индија е страшна, се регистрираат по околу 300 илјади новозаболени во еден ден, а здравствениот систем нема кашацитет да ги згрижи сите кои имаат потреба од тоа.
Индискиот премиер, Нарендра Моди, денеска ги повика сите граѓани во земјата да се вакцинираат и да бидат внимателни, имајќи предвид дека Индија е погодена како што рече од „бура“ на заразата со коронавирус.
Само во последните 24 часа бројот на инфекции со коронавирус се зголеми за нови 349 691 случаи, што претставува нов црн рекорд во земјата, четврти ден по ред.
Поради недостиг на боци со кислород и кревети, болниците во Њу Делхи и низ целата земја почнаа да одбиваат пациенти.
„Бевме самоуверени, расположението ни се подобри по првиот бран, но оваа бура ја стресе земјата“,
рече Моди во радио обраќање.
Владата на Моди се соочува со критики затоа што дозволи големи верски и политички митинзи откако бројот на заразени во Индија нагло опадна под 10 000 на ден и не планираше да го зајакнува здравствениот систем.
Шест болници во индискиот главен град Делхи останаа целосно без кислород, а лекарите велат дека состојбата и во другите болници не е подобра, бидејќи им остануваат залихи само за неколку часа.
Ситуацијата во Индија веќе неколу недели е драматична, со нагло зголемување на бројот на заразени и починати а капацитетите на болниците се целосно исполнети.
Голем број од пациентите во болниците починаа, чекајќи кислород, а над 99 отсто од сите кревети за интензивна нега се полни.
Домашните и странските медиуми објавуваат драматични фотографии на по двајца пациенти во еден болнички кревет, и луѓе кои лежат во автомобилите.