Профилот е суспендиран со кратко образложение дека Икс отстранува профили што ги прекршуваат правилата на мрежата. Сепак, не е јасно за какво прекршување станува збор, а одговор не даде ниту сопственикот на Икс, Илон Маск
Социјалната мрежа Икс утрово го суспендираше новиот профил на врховниот лидер на Иран, ајатолахот Али Хамнеи, на кој објавуваше пораки на хебрејски јазик, пренесува „Асошиејтед прес (АП)“.
Профилот е суспендиран со кратко образложение дека Икс отстранува профили што ги прекршуваат правилата на мрежата. Сепак, не е јасно за какво прекршување станува збор, а одговор не даде ниту сопственикот на Икс, Илон Маск.
Според правилата на Икс, се забранува содржина што промовира насилство и омраза, но понекогаш прават исклучок за државни или владини објави.
Овој потег, како што пишува и АП, следува откако Израел пред два дена изврши напад врз Иран.
Ајатолахот Али Хамнеи по нападот порача дека иранските власти треба да одредат како најдобро да му ја покажат моќта на Израел.
„Злото што го изврши ционистичкиот режим (Израел) не треба ниту да се минимизира ниту да се преувеличува“,
рече тој.
Новиот профил на Хамнеи беше отворен на хебрејски јазик со исламски поздрав „Во името на Бога, Милостливиот и Семилостливиот“, по што следуваше порака и на албански јазик, усогласена со неговиот последен говор.
„Ќе го натераме да разбере каква сила, способност и волја има иранската нација“,
се вели во неговата порака пренесена од израелските медиуми.
Инаку, кабинетот на Хамнеи на социјалните мрежи одржува повеќе профили на 85-годишниот Хамнеи и во минатото се испраќале пораки на различни јазици.
Ова не е првпат профили на Хамнеи да се суспендирани од социјалните мрежи. Дури одредени социјални мрежи со години го блокираа и Иран.
Тоа се случи и на почетокот на годината кога преку нив се даваше поддршка на Хамас по нападите на Израел на 7 октомври 2023 година.