Државната советничка во Министерството за правда, Татјана Васиќ Бозаџиева, е кандидатката за уставна судијка која претпладнево беше на „менито“ на Комисијата за прашања на изборите и именувањата. Оваа комисија ја има задачата конечно да избере нови уставни судии, додека Уставниот суд во моментов работи на граница од кворум.
Васиќ Бозаџиева е едно од трите имиња предложени од мнозинството. Според пратеничката на опозициската ВМРО-ДПМНЕ, Марија Петрушевска, Васиќ Бозаџиева не е соодветен предлог за уставен судија и побара да се повлече нејзината кандидатура. Како што посочи, со биографија од две страници Васиќ не може да ги заштити човековите права на граѓаните.
„Госпоѓата Васиќ не е истакнат правник. Ги нема условите и критериумите кои што треба да ги поседува еден кандидат за член на уставен судија. Истата не може да ја зајакне, ниту пак да ја унапреди работата на Уставниот суд, ниту да ја штити уставноста на Република Македонија. Не може да ја подобри довербата на граѓаните во институциите, особено не во судството и затоа истата не може да добие подрршка да биде избрана за уставен судија. Васиќ би можела да биде солиден помлад соработник во некои од министерствата за јавна администрација, во некои техничко-логистичките служби на судовите, но во никој случај не би можела да биде уставен судија“,
оцени Петрушевска.
Досега, утврден е само еден предлог за Уставен судија. Тоа е апелацискиот судија од Скопје, Фатмир Скендер, кој исто беше предлог на мнозинството. Третиот кандидат на мнозинството е Љубомир Јовески, актуелниот државен јавен обвинител.
Опозицијата предложи шест кандидати за уставни судии. Веќе им беше одбиен предлогот на ВМРО-ДПМНЕ, професорката од Правниот факултет „Јустинијан Први“ во Скопје Родна Живковска, да биде избрана за уставен судија. Мнозинството критикуваше дека таа е мајка на претседателот на Советот на Кисела Вода од редовите на ВМРО-ДПМНЕ и дека е адвокат на ЈП „Лајка“. Останатите пет предлози на опозицијата се: универзитетскиот професор Саво Климовски, судијата во пензија Бранко Секуловски, обвинителот Тодор Витларов, судијката од Управниот суд Весна Јовановска и Војислав Димовски, јавен обвинител од Основното јавно обвинителство во Охрид.
Од пристигнатите кандидатури, Собранието треба да избере тројца уставни судии. А Уставниот суд во моментов работи без четворица судии на кои им истече мандатот, од предвидени девет судии. Во нецелосен состав е околу една година откако кон крајот на мај лани им истекоа мандатите на тројца судии – Сали Мурати, Елена Гошева и Никола Ивановски. Кон средината на јануари годинава, пак, му заврши мандатот и на судијата Јован Јосифовски