Досега со ваков услов излезе и АА, чиј в.д. претседател, Арбен Таравари, смета дека за ваква уставна промена се подготвени и сите македонски партии
По Алијанса за Албанците (АА), и втората опозициска партија од албанскиот блок, Беса, излезе со услов за поддршка на уставните измени со кои Бугарите и други народи би се вметнале во Преамбулата од Уставот. Условот е терминот „20 проценти“ да се замени со „албански јазик“.
„Тоа е еден од условите што кога ќе се отворат уставните промени ние ќе излезе со конкретни барања. Главното барање ќе биде ова“,
рече денеска на прес-конференција Арафат Шабани од Беса.
Тој рече дека очекува многу порационален пристап од македонска страна во однос на ова прашање со оглед дека свеста е зголемена и Македонците најдобро го разбираат овој проблем.
„Мислам дека статусот на македонскиот јазик треба да се реши еднаш засекогаш, не само во Македонија, туку и надвор од Македонија. Исто и статусот на албанскиот јазик, бидејќи е многу понижувачки албанскиот јазик да се идентификува како ’20 проценти‘. Мислам дека тука има услови од сите членови на политичкиот фактор да се реши и од тоа да не се очекуваат политички поени“,
рече Шабани.
Со слична позиција пред три дена настапи и в.д. претседателот на АА, Арбен Таравари. Тој рече и дека смета оти на вакви промени подготвени се и сите македонски партии.
„Предлогот ќе биде нешто што не ќе може да се одбие. Едно од барањата ќе биде и еднаш за секогаш да ја тргнеме формулацијата 20 отсто и да биде барем како што беше во Југославија, македонскиот и албанскиот јазик беа јазици коишто официјално се користеа. За тоа мислам дека има подготвеност од сите македонскиот партии“,
рече Таравари.
Лидерот на најголемата опозициска партија во македонскиот блок Христијан Мицкоски, пак, вчера зборуваше на оваа тема на Научниот симпозиум 129 години ВМРО – „Борба која трае“, што го организираше ВМРО-ДПМНЕ. Тој кажа дека е подготвен да разговара за сè, но и праша дали ќе има гаранции од Брисел ако се направат уставните измени.
„Денеска имаме два нови моменти кои ја оптоваруваат нашата европска иднина, членството во ЕУ. Првиот е условот за Уставот и промената на Преамбулата и вториот од пред некој ден барање за бришење на бројката и процентот со кој ќе се детерминира јазикот на Албанскиот народ. Ајде и за тоа да зборуваме. Јас сум подготвен за се да зборувам. Ајде аргументите да ги ставиме на маса. Ако ја смениме Преамбулата ќе бидеме ли во 2030 година членка на ЕУ, ќе потпише ли некој дека ќе бидеме членка како што ни ветуваат, ќе донесе ли Европскиот парламент заклучок и резолуција со кој се признава посебноста на македонскиот јазик“,
рече вчера Мицкоски.