Откако ВМРО-ДПМНЕ обвини дека власта дели хуманитарна помош на ранливи категории на граѓани во Струмица, а со тоа врши изборен поткуп, со реакција излегоа од Здружението „Сите заедно можеме“.
Александар Марковски член на Здружението, на својот профил на Фејсбук порача дека хуманитарната акција била уредно пријавена и дека во време на пандемија, кога не се знае кога ќе има избори, ваков тип на акција не може да се смета за изборен поткуп.
„Ние како невладино здружение за хуманитарни цели Сите Заедно Можеме, постојано ги повикуваме сите политички партии, сите правни и физички лица кој имат можност да донираат прехрабени и останати продукти согласно своите можности а во знак на солидарност со своите сограѓани. Идеата за функционирање на здружението беше и е да не се политизира здраствената криза но за жал една политичка партија покрај тоа што не даде никаков придонес постојано врши опструкции преку својот министер за внатрешни работи со цел да ја спречат хуманитарната акција“,
се вели во објавата на Марковски.
Истото Здружение ја организираше и хуманитарната акција со донации од семејството Заеви, чија дистрибуција беше запрена од полицијата.
Од МВР тогаш изјавија дека акцијата на полицијата била во насока на проверка на дозволите за движење на волонтерите, а на пакетите се правело проверка.
Лидерот на СДСМ Зоран Заев пак, тогаш изјави дека волонтерите биле приведени и им се заканувале.
ВМРО-ДПМНЕ ја повика Државната комисија за спречување на корупцијата да го испита случајот.