Полицијата вчера влегла во магацинот за контрола на хуманитарните пакети, кои се донација од семејството Заеви во време на кризата со коронавирусот. Упадот бил додека волонтери од здружението „Сите заедно можеме“ пакувале пакети со прехранбени производи, а дистрибуцијата, според првичните информации, била запрена.
Во контролата учествувало и обвинителство. Струмичкиот јавен обвинител Миле Петков посочува дека обвинителството постапило по барање на полицијата.
Од МВР засега нема официјални информации во врска со вчерашната акција на струмичката полиција, додека од СВР Струмица најавуваат дека набргу ќе излезат со соопштение во врска со случувањата.
Во меѓувреме, се огласи портпаролот на СДСМ и пратеник од Струмица во последниот парламентарен состав, Костадин Костадинов, кој вели дека станува збор за полициска хајка на ВМРО-ДПМНЕ.
„Тастерот на Мицкоски и ВМРО-ДПМНЕ, Наќе Чулев, вчера организираше полициска хајка врз млади деца волонтери кои помагаат во овие тешки моменти. Ова, почитувани граѓани, е олицетворение на Груевски и бившиот негов режим, Струмица и струмичани добро го знаат тоа. Наскоро ќе заврши и конечно сѐ ќе си дојде на свое, да не дозволиме такво зло да ни се повтори“,
вели Костадинов.
Дописничката на МИА од Струмица, пак, јавува дека полицијата и денеска е пред магацинот и сѐ уште е стопирана дистрибуцијата на хуманитарната помош.