Груевски пишува и дека во Македонија не одлучува судот, туку контролирани медиуми, аналитичари и експерти кои чекаат да ја „дораспарчат жртвата“, реагирајќи на денешната седумгодишна казна затвор која му ја изрече судот за случајот „Плацови на Водно“
Македонија живее време на политички мотивирани судења против политички неистомисленици на власта, полошо од периодот на 1949 година. Исто како и тогаш: во име на народот. Една модерна инквизиција во која жртвата пред судењето да почне е веќе осудена и неформално е договорена и висината на казната помеѓу спрегата власт-опозиција-судство, напиша на Фејсбук поранешниот премиер Никола Груевски, реагирајќи на пресудата за случајот „Плацеви на Водно“, кој доби седумгодишна затворска казна.
„Пресудите и висината на казните се одредени уште пред да почне судењето, се друго е „театар“ за јавноста, односно време на пропаганда кога и јавноста треба да се убеди, што завршува со долг политички говор и некаква психолошка анализа на судијата, бидејќи за правна нема реални аргументи. Аудио снимки се прифаќаат како доказ кога им одговара на обвинителството и судот, односно на власта за да осудат некој што им е таргет, но ако истите треба да докажат дека таргетираното лице нема вина, тогаш истите не се дозволува да се изведат како докази. Обвинителството и судот можно е да те прогласат дека си земал голема количина пари од некаде, без било каков доказ, матерјален доказ или изјава на сведок, односно без апсолутно ништо што наведува или уште помалку го докажува тоа, и без никаков срам да ја почнат реченицата со зборовите односно фразата: „Се докажа дека…“, па се продолжува со куп испревртени тези креирани да си го покријат сопствениот срам пред јавноста“,
се вели во реакцијата на Груевски.
Груевски пишува и дека во Македонија не одлучува судот, туку контролирани медиуми, аналитичари и експерти кои чекаат да ја „дораспарчат жртвата“.
„Ако си политички ставен на острел може да те обвинат и што не си пријавил имот кој не е и никогаш не бил твој и истиот уште и да го запленат заради политичко пропагандни цели, а вистинските негови сопственици да си молчат и уште да се среќни што “извлекле жива глава”, во смисла што незаслужено во една политичка хајка не добиле долгогодишна затворска казна иако често и тие немаат некоја објективна вина за такво нешто да им се случи. Во една таква атмосфера се е можно. Во Македонија во ова време во политички мотивираните процеси не суди судот, туку политиката. Потоа подготвени чекаат сервилните и контролирани медиуми, т.н. аналитичари и т.н. експерти да ја дораспарчат жртвата која нема никаква реална вина и да одслугуваат на политиката. Власта преку правосудниот систем прави што сака, кому сака нешто запленува и во колкава сака вредност независно од се, кому сака не запленува, зависно од близината со неа. Нема критична маса меѓу стручната елита која е спремна да постави логични прашања колку и да гледа беззаконие и апсурдни процеси. Но, ништо не е вечно…“,
додава Груевски во објавата на Фејсбук.