Строго ќе се почитуваат сите права и обврски предвидени со законот за работни односи и другите закони, вели првиот вицепремиер
Првиот вицепремиер и министер за политички систем и односи меѓу заедниците, Артан Груби, во нова објава на социјалните мрежи посветена на договорот со „Бехтел и Енка“ за изградбата на коридорите 8 и 10-д вели дека првичните прогнози се дека овој американско-турски конзорциум за изградба на автопатските делници ќе ангажира над 70 отсто локална работна сила.
„Според посебниот закон и договорот, конзорциумот ’Бехтел и Енка‘ е обврзан да ангажира најмалку 51 отсто од локалните ресурси. Во Косово над 70 отсто од вработените биле локални, додека во Албанија и Србија околу 50 отсто. Првичните прогнози, по анализата на пазарот, се дека и кај нас ќе биде ангажирана целата расположлива работна сила, по можност и над 70%. Строго ќе се почитуваат сите права и обврски предвидени со законот за работни односи и другите закони“,
вели Груби.
Тој повторно ги обвини ВМРО-ДПМНЕ и Левица дека со блокадите на законите во Собранието ќе ја чинат државата над 150 милиони евра и две години залудно потрошено време.
„На ниту еден начин не можат да ја спречат реализацијата на проектот, можат само да го поскапат и да го одложат завршувањето на автопатите. Дали автопатите ќе се градат побрзо и поевтино или побавно и поскапо, зависи од пратениците“,
додаде Груби.
Ова е последната од серија објави на првиот вицепремиер, откако во саботата вечерта тој во обид да го оправда договорот со „Бехтел и Енка“ употреби нов „аргумент“ во јавното препукување со опозицијата посочувајќи ја Србија како пример каде се градело на ваков начин како што треба да се гради и во Македонија. Потоа следуваа и преписки од ВМРО-ДПМНЕ во кои се тврдеше дека Груби манипулира, но и одговори од негова страна.
*Поврзани вести:
Артан Груби се угледа и на Србија за да го брани договорот со „Бехтел и Енка“
Груби контра Јаревски: ВМРО-ДПМНЕ лаже, „Бехтел и Енка“ во Србија градат како во Македонија
ВМРО-ДПМНЕ тврди дека има план да ги надомести штетите од договорот со „Бехтел и Енка“