Според Ландау, разговорите поминале во топла и суштинска атмосфера
Заменик-државниот секретар на Соединетите Американски Држави, Кристофер Ландау, преку објава на социјалната мрежа Икс изрази задоволство од денешната средба во Вашингтон со министерот за надворешни работи и надворешна трговија на Северна Македонија, Тимчо Муцунски.
Ландау упати позитивни пораки по однос на билатералните односи и меѓусебната соработка.
„Навистина уживам во моите средби со министерот за надворешни работи, Тимчо Муцунски. Нашите две земји се многу тесно поврзани по широк спектар на политички, економски и безбедносни прашања и двајцата секогаш имаме многу искрени и корисни дискусии“,
истакна Ландау во својата објава.
I really enjoy my interactions with Foreign Minister @TimcoMucunski of North Macedonia. Our two countries are very closely aligned on a wide range of political, economic, and security issues and the two of us always have very candid and rewarding discussions. It was a real… pic.twitter.com/p3L1YxorQp
— Christopher Landau (@DeputySecState) July 17, 2026
Тој дополнува дека пречекот на шефот на македонската дипломатија во седиштето на Стејт департментот претставувал вистинско задоволство.
Според Ландау, разговорите поминале во топла и суштинска атмосфера.
Претходно денеска и министерот Муцунски информираше за средбата со Ландау и рече дека главна тема на разговорите било зајакнување на стратешкото партнерство и унапредувањето на билатералната соработка меѓу двете земји.
И Муцунски го оцени разговорот како отворен, пријателски и содржаен.
Според Муцунски, посебно внимание било посветено на одбраната и сојузништвото во рамките на НАТО алијансата, како и на развојот на економијата, енергетиката и регионалната поврзаност.