Двајца американски војници загинаа, а еден се води како исчезнат по ирански напади во Јордан. Иран во меѓувреме го суспендираше договорот со САД
Двајца американски војници загинаа, а еден се води како исчезнат по ирански напади во Јордан, потврди американската Централна команда, CENTCOM. Ова се првите американски воени жртви во конфликтот со Иран од март, во период на засилени тензии меѓу двете држави и нова ескалација во регионот. Во објава на социјалните мрежи, CENTCOM соопшти дека американските сили и нивните партнери на 17 јули одбивале ирански напади со балистички ракети и беспилотни летала во Јордан.
„Двајца американски војници загинаа во борба во Јордан на 17 јули, додека силите на Централната команда и партнерите одбиваа ирански напади со балистички ракети и беспилотни летала. Еден војник дополнително се води како исчезнат“, се наведува во соопштението. Идентитетот на загинатите нема да биде објавен додека не бидат известени нивните семејства. Уште четворица американски војници биле итно префрлени во болници во Јордан, но во меѓувреме биле пуштени. Останатите припадници на единиците имале полесни повреди и се вратиле на должност.
Со последните жртви, вкупниот број загинати американски војници во конфликтот што трае речиси пет месеци се искачи на 15. Претходните смртни случаи беа регистрирани во март. Шест резервисти на американската војска загинаа на 1 март во директен ирански напад врз оперативен центар во кувајтското пристаниште Шуaиба. Неколку дена подоцна, наредник на копнената војска почина од повреди здобиени за време на напад во Саудиска Арабија.
Последните шест смртни случаи пред нападот во Јордан се случија на 12 март, при пад на авион за дополнување гориво KC-135 Stratotanker во западен Ирак. Воени извори тогаш наведоа дека инцидентот не бил предизвикан од непријателски оган.
Иран го суспендира договорот со САД
Новите загуби доаѓаат откако кревкото примирје меѓу Иран и САД пропадна, а двете страни продолжија со размена на напади. По американските удари следеа бранови ирански дронови и ракети врз сè поголем број цели во земји каде што се наоѓаат американски бази. Ирански претставници претходно соопштија дека во последните 24 часа загинале 12 Иранци, со што вкупниот број жртви во земјата во оваа фаза од војната достигнал 50. Заменик-гувернерот на иранската покраина Хормозган изјави дека во американски ракетен напад било уништено построение за десалинизација на вода. Американската војска засега не ги коментирала овие тврдења.Иранската влада во меѓувреме објави дека рамковниот договор меѓу САД и Иран повеќе не важи, јави иранската новинска агенција Фарс. Заменик-министерот за надворешни работи Казем Харибабади изјави дека Иран го суспендирал договорот, обвинувајќи ги САД за прекршување на обврските од Меморандумот за разбирање од Исламабад.
„Зафатени сме со одбрана на земјата“, изјави Харибабади во телевизиско интервју.
Тој додаде дека Американците со своите „агресивни мерки“ ги прекршиле обврските од договорениот документ, поради што Иран смета дека повеќе не е должен да ги почитува своите обврски.
Хамнеи: Потписот на Трамп е безвреден
Иранскиот врховен лидер Мојтаба Хамнеи во писмена изјава оцени дека повторените американски прекршувања на договорот покажале дека потписот на претседателот Доналд Трамп е „целосно безвреден и лишен од кредибилитет“, пренесува Reuters. Хамнеи порача дека Соединетите Држави треба да знаат дека иранскиот народ и „фронтот на отпорот“ имаат „незаборавни лекции“ за нив. САД и Иран во средината на јуни се согласија на рамковен договор што требаше да го отвори патот кон траен крај на војната. Документот предвидуваше постигнување конечен договор во рок од 60 дена и отворање на Ормускиот Теснец. Прекинот на огнот беше во сила од почетокот на април, но конфликтот повторно ескалираше на почетокот на јули. Со новите американски жртви во Јордан и повлекувањето на Иран од договорот, кризата влегува во уште поопасна фаза.