Според Артан Груби за барањето за свикување на Собранието потребен е политички консензус, иако смета дека ниту една партија не ги спори одлуките за прогласување на вонредна состојба
ДУИ сѐ уште нема официјален став за иницијативата за свикување на Собранието со цел да се потврдат одлуките на претседателот Пендаровски за прогласување на вонредна состојба. Пратеникот Артан Груби во интервју за ТВ24 вели дека неговата партија сѐ уште го нема видено документот, ниту пак за него било разговарано во Владата.
Сепак, посочува дека многу е тешко да се свика самораспуштен Парламент и за ова прашање смета дека е неопходен политички консензус.
„За иницијативата дознав вечерта во 10 часот од страна на координаторот на СДСМ, којшто само ме информира дека неговата пратеничка група ќе поднесе иницијатива, впрочем не побара ниту поддршка ниту ме информира околу содржината на документот. Така што не можам да изградам став по однос на барањето, но во координација со Талат Џафери и слушајќи ги експертите, можам да кажам дека многу е тешко да се врати веќе консензуално распуштено Собрание“,
изјави Груби.
Тој не прецизираше дали собранискиот спикер Талат Џафери ќе свика седница. Порача дека и Уставниот суд треба да се произнесе за ова прашање, во однос дали може самораспуштено Собрание да биде повторно свикано да заседава.
„Зошто ваква иницијатива немаше при првото прогласување на вонредна состојба, туку сега при второто? Не гледам дека некој го спори прогласувањето на вонредна состојба досега“,
изјави Груби.
Според Груби дебатата за свикување на Собранието е „непотребен законски и процедурален лавиринт“ кој не ги засега граѓаните.
„Никој претходно се нема соочено со ваква ситуација каква што имаме за прв пат во државата. Затоа сметам дека дебатава не е на место, нема оспорување од било која страна во однос на процедурата и граѓаните ги интересира само менаџирањето на состојбата“,
порача Груби.
Според него, спорно е и како ќе се соберат 120 пратеници во Собранието, бидејќи како што рече, се уште нема усвоено правила за онлајн гласање во законодавниот дом.
Барањето што го иницираше СДСМ за свикување итна собраниска седница за потврдување на одлуките на шефот на државата за прогласување вонредна состојба вчера стигна кај спикерот Талат Џафери, кој треба да одлучи дали ќе закаже седница.
Претходно, за „360 степени“ Џафери изјави дека како претседател на парламентот немал право ниту мандат, со индивидуален акт, односно со решение за свикување седница, да ја поништи одлуката на Собранието за распуштање.
Поврзани вести:
Мицкоски во „360 степени“: Апелирам до Пендаровски да свика нова лидерска средба