Градоначалникот на Вевчани, Сашо Јанкоски и Општината го осудија палењето на бугарското знаме за време на карневалот, од чија организација годинава тие се повлекоа поради ситуацијата со ковид-19.
Овој чин, вели градоначалникот, не соодветствува со ставот на Општината и најголемиот процент од нејзиното население.
„Напротив, Вевчани е меѓу првите општини во Македонија збратимено со гратчето Мелник, општина Сандански, како членови на Асоцијацијата на карневалските градови кои негуваат слични традиции. Општина Вевчани и Вевчанци и во минатото веднаш ги осудувале палењата на знамиња и на други држави и упорно стоиме на ваквиот став и во иднина. Сметаме дека ваквиот чин на изразување револт е недопустлив макар и за најирационалниот, најстариот и најавтентично сочуван пагански карневал во светот како што е опишуван Вевчанскиот карневал низ годините од речиси сите светските медиуми. Се надеваме дека овој несреќен чин и ирационален чин нема да фрли дамка на меѓусоседските односи“,
пишува во реакцијата на градоначалникот и Општината.
Поради овој чин, како што вчера објави министерката за надворешни работи на Бугарија, Екатерина Захариева, бугарскиот амбасадор во Скопје упатил остар вербален протест до македонските власти.
Со осуда се јавија и од Министерството за надворешни работи, како и претседателот Стево Пендаровски. Обвинителството од Струга, пак, отвори истрага.
*Поврзани вести:
Софија со остар демарш до македонското МНР поради запалено бугарско знаме во Вевчани
Пендаровски со кратка порака: Палењето на бугарското знаме е за осуда