Уште вчера наутро од наша страна е изречена казна на приватна фирма за која утврдивме дека има исфрлано отпад на зелена површина. Фирмата не постапувала според налозите што ѝ биле дадени, велат од Општина Аеродром и додаваат дека не ја исклучуваат можноста за поведување кривична постапка за инспекторите кои изрекле ваква незаконска санкција, како и за сите одговорни лица во Град Скопје, вклучувајќи ја градоначалничката Арсовска
Општина Аеродром и градоначалникот Тимчо Муцунски ќе треба да платат казна во висина од 88 илјади евра поради исфрлање отпад на јавна површина. Од Град Скопје, чиј инспекторат ја има изречено казната, велат дека Општина Аеродром преку компанијата „Пирамид билдинг“ ангажирана на тендер, наместо на предвидената локација во ЈП „Дрисла“, општинскиот отпад го исфрлала на зелена површина, во парк во близина на управната зграда на Фудбалската федерација на Македонија, на булеварот АСНОМ, со што направиле нова дива депонија.
Исто така, од Град Скопје велат и дека против сите прекршители ќе бидат поднесени и соодветни кривични пријави.
Со ова, како што велат од Град Скопје, се загрозуваат животната средина и здравјето на граѓаните.
Од Градот велат дека рокот за подмирување на казната е осум дена од денот на изрекувањето, а во спротивно таа присилно ќе се наплати.
Од Општина Аеродром, пак, велат дека фирмата која ја спомнуваат од Град Скопје веќе е казнета од страна на локалните власти, и тоа во текот на вчерашниот ден.
„Уште вчера наутро од наша страна е изречена казна на приватна фирма за која утврдивме дека има исфрлано отпад на зелена површина. Фирмата не постапувала според налозите што ѝ биле дадени“,
вели во изјава за „360 степени“ градоначалникот на Аеродром, Тимчо Муцунски.
Според него, не може јавен субјект да биде казнет за постапки што ги има направено приватен субјект.
Тој најави дека од страна на Општината ќе биде искористено правото на жалба за казната изречена од Град Скопје.
„До овој момент до Општина Аеродром нема стигнато никаква документација поврзана со наводите наведени во соопштението до медиумите. По евентуалното добивањето на документацијата поврзана со санкцијата, фактот дека таа е целосно неточна ќе го докажеме во соодветна законска постапка пред надлежните институции. Воедно, не ја исклучуваме можноста за поведување кривична постапка за инспекторите кои изрекле ваква незаконска санкција, како и за сите одговорни лица во градот Скопје, вклучувајќи ја градоначалничката Арсовска“,
се вели во денешното соопштението од Општина Аеродром.
Оттаму додаваат дека Арсовска, која е единствениот виновник на комуналниот хаос во Градот, наместо да диригира смешни прекршочни решенија, неопходно е правниците и инспекторите кои се дел од нејзиниот тим, да ги упати на повторна едукација на Правниот факултет, каде што ќе ги научат основни принципи за толкување на законот и изрекување прекршочна санкција.
„Самата Арсовска наместо да се занимава со наместени, паушални и конструирани постапки со кои дополнително си го намалува рејтингот приближен до нула, пополезно ќе биде да се посвети на проектите кои ги ветуваше пред граѓаните, како гимназијата во Аеродром, Мегапаркот зад ФФМ и Иновацискиот парк зад кулите на ‘Џевахир’“,
се додава во соопштението.
На веб-страницата на Општина Аеродром, може да се види дека вчера е објавена информација дека општинските комунални инспектори изрекле прекршочна казна за правно лице, приватна компанија која спротивно на законите и без дозвола од општината, одложувала отпад на локација која не е определена за таа намена. Санкцијата, како што се наведува во соопштението, е изречена согласно член 14 од Законот за јавна чистота.
„Општинскиот инспекторат ја изрече казната откако инспекторите утврдиле прекршување на законот, по претходна дојава од граѓани. Станува збор за локација која се наоѓа во населбата Ново Лисиче и на која претходно, комуналните служби на Општина Аеродром во неколку наврати, користејќи ги сопствените капацитети спроведоа акција за чистење на истата локација“,
се додава во вчерашното соопштение од Општина Аеродром и се додава дека ќе има засилени контроли на терен ќе изрекуваат санкции за сите оние кои ја загадуваат животната средина и постапуваат спротивно на законот.
Минатата недела, Град Скопје изрече казна во висина од 90 илјади евра и за Општина Кисела Вода, за како што рекоа непрописно одлагање отпад пред скопската депонија „Дрисла“.
Казната за Кисела Вода дојде откако по комуналниот крах на Скопје, поради штрајк на вработени во јавното претпријатие „Комунална хигиена“, градоначалниците на ВМРО-ДПМНЕ се самоорганизираа и почнаа со чистење на општините со кои раководат. Градоначалниците на Аеродром, Тимчо Муцунски и на Кисела Вода, Орце Ѓорѓиевски, кои со камионите со смет од нивните општини се упатија кон депонијата „Дрисла“ и оттаму преку пренос во живо обвинија дека не им се дозволува да го депонираат ѓубрето, истото го истоварија пред депонијата.