Говор на омраза, социјално исклучување, нарушена телесна автономија и ограничен пристап до услуги кои се достапни за сите останати, се само дел од проблемите со кои се соочуваат припадниците на ЛГБТИ+ заедницата и трансродовите луѓе во Македонија, порачаа учесниците на Парадата на гордоста во Скопје.
Лила Милиќ, трансродово лице, кажа дека органите на прогон во земјава немаат доволни капацитети за препознавање и заштита на маргинализираните луѓе. Милиќ посочи и дека говорот на омраза зема замав, а Македонија е далеку од демократско општесто, иако декларативно се прикажува така.
„И покрај тоа што безброј пати сме пријавувале документирани случаи на говор на омраза и до полицијата и до Јавното обвинителство, сè уште немаме ниту еден случај во кој поединец или група биле осудени. Јас лично, континуирано сум жртва на говор на омраза, особено од организации кои се здружуваат со единствена цел – да ги негираат правата на ЛГБТИ+ заедницата и родовата еднаквост. Ме нарекуваат болна, неморална, ми посакуваат ќотек, силување, смрт, не го препознаваат мојот родов идентитет, постојано ми се закануваат и ме исмејуваат. Многупати досега сум поднела кривична пријава и сум побарала заштита, но Обвинителството и полицијата ништо не преземале. Пораката од институциите до мене е јасна – мојот живот и животот на трансродовите лица не е подеднакво вреден за заштита“,
кажа Милиќ и дополни дека верските лидери се надоврзуваат на оваа ситуација и се гласни да не се донесе Законот за родова еднаквост и Законот за матична евиденција во делот за правното признавање на родот.
Мајка на лице со различна сексуална ориентација пак, порача дека родителите имаат обврска и должност да ги заштитат своите деца.
„Стојам како горда мајка на син кој е успешен и реализиран млад човек, кој по ништо не се разликува од другите успешни млади, за кои некои ќе кажат ‘нормални млади’. Процесот на осознавање и прифаќање на различните сексуални ориентации и родовиот идентитет на нашите деца за нас родителите не е ниту брз – ниту лесен процес. Јас тоа добро го знам, јас поминав низ тоа. Но, не е лесен ниту за нашите деца. Тие се збунети, исплашени, тажни, очајни, лути и трагаат по одговори на безброј прашања исто како и нас. Тие не избираат да бидат различни, тие се едноставно различни, но само по нивната сексуална ориентација и родов идентитет. Ние одлучивме да креираме дом во кој нашето дете ќе се чувствува безбедно, поддржано и сакано. Одлучивме да бидеме покрај него и заедно да го прифатиме предизвикот на новата реалност. Избравме, наместо да се срамиме, да бидеме горди на нашиот син и да не се грижиме што ќе кажат соседите, бидејќи тој тоа го заслужува“,
порача таа.
Учесниците порачаа дека „Скопје Прајд“, како и другите паради на гордоста, е празник на љубовта и невидливоста на маргинализираните и повод за славење на жилавоста на нивната борба за еднаквост.
Стотици граѓани учествуваа на четвртата Парада на гордоста во Скопје, која започна во 19 часот во паркот „Жена борец“ спроти зградата на парламентот.
Учесниците со музика, но и под силно полициско обезбедување продолжија со протестен марш низ центарот на главниот град.
По маршот, Парадата продолжи со забава во Градскиот парк, која е најавена дека ќе трае до 1 часот.
Покрај граѓани и активисти за човекови права, на Парадата присуствуваат и голем број на гости од странство, а настанот го поддржаа дел од политичар(к)ите од власта и голем број странски амбасадори во земјава.