Шеесет и петгодишната Себахат Демирали го победи коронавирусот и вели дека иако сега се чувствува подобро, сè уште при најмал напор, има замор и губење на здивот. Таа била 16 дена хоспитализирана на Инфективното одделение во Општата болница во Охрид.
„Желбата за живот ме мотивираше да ги издржам сите препреки кои морам да признаам не беа лесни. Се чувствувам подобро, но сѐ уште при најмал напор, имам замор и губење на здивот и покрај тоа што пред пет недели ја напуштив болницата. Со тек на време се надевам дека ќе ги пребродам здравствените проблеми кои ги имам. Терапијата ја добивав на време, бев пациент со потешка клиничка слика и бев изложена на 24 часовна кислородна поддршка поради тоа што имав и други тешки здравствени проблеми. Се заблагодарувам на целиот медицински персонал за севкупната грижа. Тие ни беа на располагање 24 часа во денот. Директорот секој ден доаѓаше во посета кај сите пациенти и ми даваше поддршка која допринесе да ја пребродам оваа тешка болест“,
вели Демирали.
Таа е среќна што и нејзиниот син е веќе излекуван од ковид-19, а сега и двајцата се поддршка еден на друг.
„За среќа, закрепнувањето на синот од ковид-19 беше полесно и побрзо. Сега двајцата сме добро и сме најголема поддршка еден на друг“,
додава таа.