Галена Николовска Ризвановиќ ја доби наградата за сторијата „Бесплатната контрацепција и по пет години е само владино ветување на хартија“, додека Зоран Јованоски го понесе признанието за темата „Пристојно домување – (не)остварлив сон за дел од семејствата во ромските населби“
Новинарите на „360 степени“, Галена Николовска Ризвановиќ и Зоран Јованоски, се меѓу добитниците на наградата „Гласник на невидливите“ за 2023 година, која ја доделува Македонската платформа против сиромаштија (МППС).
Николовска Ризвановиќ наградата ја доби за сторијата „Бесплатната контрацепција и по пет години е само владино ветување на хартија“, додека колегата Јованоски го понесе признанието, односно наградата за темата „Пристојно домување – (не)остварлив сон за дел од семејствата во ромските населби“.
Новинарите на „360 степени“ се најдоа во друштво на уште пет стории од други редакции кои, исто така, ја понесоа наградата како признание за придонесот што преку своите новинарски производи го дадоа за да се слушне гласот на лицата кои поминуваат низ тежок пат во нашето општество, соочувајќи се со сиромаштија, социјална исклученост и нееднаквост.
Свеченото доделување на наградите се одржа вечерва во кафе-барот „Цреша“ во Скопје.
За наградите одлучуваше жири-комисија која, како што соопштија од МППС, деновиве го кажала последниот збор и со задоволство информира за добитниците на наградата, кои по азбучен ред се:
- Александра Максимовска и Сузана Андоновиќ – „Жените Ромки сè уште дискриминирани при вработување“
- Ана Арсеновска Зафирова – „Со рачни изработки над ограничувањата“
- Ангела Рајчевска – „Децaта упатени во воспитно-поправен дом лишени од задолжителното образование“
- Галена Николовска Ризвановиќ – „Бесплатната контрацепција и по пет години е само владино ветување на хартија“
- Зоран Јованоски – „Пристојно домување – (не)остварлив сон за дел од семејствата во ромските населби“
- Ристо Каратановски – „Една слика – илјада зборови! „Еден“ знак – цела галаксија!“
- Фатиме Фазљији – „Жените се свесни за економското насилство, но тоа потешко се препознава оти е покриено си изјави на љубов“
„Секој ваш збор, фотографија и видео даваат надеж дека еден ден ова општество ќе биде подобро за сите“,
велат од Македонската платформа против сиромаштија.
Новинарката на „360 степени“, Галена Николовска Ризвановиќ, во својата сторија ја истражува и обратува темата за бесплатната контрацепција. Имено, уште во програмата во 2017 година Владата ветува дека ќе воведе барем едно бесплатно контрацептивно средство на позитивната листа. Идејата е контрацепцијата да им стане достапна на сите оние на кои им треба, а не можат да си ја дозволат, а со цел да се подобри планирањето на семејството и да се спречи малолетничката бременост. Шест години подоцна, и во програмата на актуелната влада, истата заложба постои само на хартија. На терен, наместо државата, помагаат невладини организации.
Јованоски, пак, во својата сторија го третира прашањето за легализација на неформалните населби во кои живеат Ромите и обезбедување достоинствено и несегрегирано сместување за оние чии живеалишта не можат да се легализираат. Станува збор за една од приоритетните заложби на државите од Западен Балкан преземени со т.н. Познанска декларација од 2019 година.