Нема да се менува автентичноста на Старата скопска чаршија, туку се заменува оштетениот камен травертин со ист таков камен, вели градоначалникот на општина Чаир, Висар Ганиу.
Во текот на вчерашниот ден на социјалните мрежи се споделуваа фотографии од градежни активности во Старата скопска чаршија, а реакции се сведоа на тоа дека ќе се уништи автентичноста по која е препознатлива.
Во таа насока, Ганиу денеска на прес-конференција нагласи дека за реализација на проектот ги имаат добиено сите потребни дозволи од надлежните институции, меѓу кои и од Управата за заштита на културното наследство која врши надзор врз целиот процес. Проектот е финансиран од Светска банка со грант во износ од околу 600 илјади евра.
„За содржината на проектот, кој го започнавме во декември 2019 година, како и за динамиката и неговите фази, во континуитет ја имаме известено јавноста. Овој проект за санација и зачувување на автентичниот изглед на Старата скопска чаршија предвидува поставување камен со ист материјал како и претходниот травертин на површина од 1.800 квадратни метри, дозволен според извештајот на лабораториската анализа за исполнување на условите“,
рече Ганиу.
Тој додаде дека имплементацијата на проектот произлегува од оштетувањето на улиците во чаршијата во изминатиот период.
„Камењата травертин што сега се вадат не се продаваат како што некој сака тоа да го прикаже. Тие се собираат и се складираат и во следниот период ќе ги класифицираме и ќе ги употребиме на улицата „Самарџиска“ во чаршијата“,
рече Ганиу.
Проектот опфаќа и реставрација на 75 дуќани и унифицирање на излозите, поставување натписи и тенди на објектите и целосна сигнализација на чаршијата.
„Целта не е да се направи измена на автентичноста на инфраструктурата на Старата скопска чаршија како што се стреми тоа да се прикаже во некои портали кои тенденциозно објавуваат информации без да ја набљудуваат содржината на проектот“,
рече Ганиу.
Од Владата денеска информираа дека станува збор за проект со кој се предвидуваат клучни инвестиции во масовна туристичка дестинација со цел зголемување на привлечноста на Старата чаршија и нејзино промовирање како главна туристичка дестинација во градот за потребите на туристите.
„Општина Чаир предложи замена на старите излози со нови излози кои би го вратиле автентичниот изглед на чаршијата. Фактичката состојба не е поволна затоа што фасадата и излозите на голем број дуќани во туристичката дестинација се дотраени или заменети со излози од ПВЦ-материјал или алуминиум. Овие користени материјали ја девалвираат вредноста на автентичната структура на Стара чаршија и ја менуваат планираната содржина и изглед на чаршијата“,
велат од Владата.
Законот за прогласување на Стара скопска чаршија за културно наследство од особено значење ги уредува клучните аспекти на заштита на споменичката целина и врши идентификација на односното добро, во поглед на неговиот назив, категорија и режим на заштита. Владата формираше и Национален совет за ревитализација на чаршијата кој изготви Програма за ревитализација која содржи идентификација на сегашната состојба.
„Една од главните констатации на постојната состојба на Стара чаршија е дека сопствениците нестручно интервенираат во екстериерите, ентериерите и во употребата на градежните материјали во објектите и на овој начин го нарушуваат автентичниот изглед на Чаршијата. Донесувањето на Законот за прогласување на Старата скопска чаршија за културно наследство во 2008 година претставува вистински чекор и израз на оперативна намера за промена на состојбата во позитивна насока и е од особено значење. Донесувањето на Програмата за ревитализација произлегува од овој закон и треба да претставува документ што треба да ги поттикне активностите во таа насока“,
велат од Владата.
*поврзана вест: (ВИДЕО) Нов обид да се среди Старата скопска чаршија